Shillong, Jylliew 19 : U Myntri Rangbah ka Jylla Conrad K Sangma ha ka sngi Palei, ula buh mawnongrim ban tei sa ia ka Additional Secretariat Complex ha Dakopgre, Tura.
Kane ka project ba T.156 klur, ka dei u soh ka jingangnud bala slem bha jong ki paidbah ka ri-lum Garo.
Haba niew ia kane ka project kum kaba “sah khana” ia ki paidbah ka Jylla bad khamtam eh ia ka ri-lum Garo, ula ong “…Ka dei ka sngi ia ngi iwei pa iwei ban kynmaw. Ngi dei ban pynpaw ia ka jingsngewnguh ia u Nongbuh Nongthaw. Ka Additional Secretariat Complex kam dei tang ka jingtei hynrei ka sakhi ia ka jingpynurlong ia ka jingangnud u paidbah”.
Ula ong ruh ba kane ka Additional Secretariat kan shakri ia ki paidbah ka ri-lum Garo, kiba la mad ia shibun ki jingeh ban ioh ia ka jingshakri bapher bapher jong ka Sorkar.
“Ki paidbah ki lah ban phaikhmat ba bun ki jingshakri ka Sorkar yn sa ioh noh na Tura. Kumta, kane ka dei ka project kaba kongsan bha ia ka Jylla bad khamtam eh ia ka ri-lum Garo bad ki briew jongka” ula bynrap.
U Myntri Rangbah ula pyntip ruh ha ka jingialang halor ka jingiaid jong ki kam ba iadei bad ka jingtei ia ka Secretariat Complex ba thymmai ha Shillong, kaba la mang haduh T.1800 klur.
“…Ngi la pynmih ia ki jingtei bapher bapher, haba buh ha ka jingmut jingpyrkhat ia ki 100 snem ban wan. Ngi kwah ban pynthikna ba ki bor synshar kin ym long tang kiba jan sha u paidbah hynrei kiba lah ban ioh ia ka jingshakri ha kano kano ka por” ula bynrap.
Ula pyntip ruh ba da ka jingthmu ban pynthikna ia ka jingpoi mar katjuh ki kam pynroi ha baroh kawei ka Jylla, ka Sorkar kala pyrkhat sani bha ban leh shibun ki kam ha man ki District bad ki Block.
“La ka dei ki Ophis thymmai ki Block, ki building ka Sub Division barim bad ba thymmai, ki District Office, ki jingtei jong ki jaka sumar, ki jingtei jong ki Pulit ne ka Pule Puthi, ngi la pynleit jingmut bha sha ka roi ka par ba janai hapoh ka Jylla” ula ong.
“Ka South Garo Hills kala rakhe ia ka jingdap 33 snem jong ka District hynnin ka sngi hynrei baroh kin sa kyndit ba ka jing tei ia ka DC Office Complex ka dang shu sdang” ula bynrap.
Ula pynpaw ia ka jingsngewkhia halor ka jingduna ki jingtei ha ka thain bad ong ba ka Sorkar MDA kala pynwandur ia ka lynti iaid ban kynjoh ia ka thong ban pynthikna ba ka Meghalaya ka dei kawei na ki Jylla kiba biang tam hapoh ka Ri.
“Ka Sorkar MDA kala mang ia ka song pisa sha baroh ki Block hapoh ka Jylla. Baroh ki jingtei ha ki District bad Block kynthup jong ki Pulit la pynbha lut mynta. Ngi la shna pynbha ruh ia baroh ki jaka sumar ha kylleng ka Jylla” ula ong.
U Conrad ula shim ruh ia ka kabu ban pyntip halor ka jingthmu ban tei ia ki Mini Secretariat ha Jowai bad Pynursla.
Halor ka Addl Secretariat, u CM ula ong ba kane ka project kan don lai tylli ki jingtei bad ka Chief Minister’s Complex yn sa pyndep noh hapoh u Kyllalyngkot 2027.
“Ngi don jingthmu ban plie noh ia ka CM complex ha ka 21 tarik Kyllalyngkot 2027 bad kan ai ia ka jingshakri kaba pura sha ki paidbah ka thain” ula ong haba pyntip ba ka Addl Secretariat kan don ia ka kamra u CM bad ki Myntri Sorkar, u Chief Secretary bad kiwei ki Heh Ophisar. Kan don ruh ia ki Ophis jong ki Tnad bapher bapher ka Sorkar.
Ha kane ka jingialang buh mawnongrim la iadonlang ruh u Spealer ka Iingdorbar Thomas A Sangma, Dy Speaker Timothy D Shira, Dy CM Snaiwbhalang Dhar, Myntri Sorkar AT Mondal, Dr Ampareen Lyngdoh, Marcuise Marak, Shakliar Warjri, Rakkam A Sangma, Paul Lyngdoh, AL Hek, Comingone Ymbon bad bun ki MLA ka ri-lum Garo.
