Shillong, Jylliew 17 : Ka Jylla Meghalaya kala sakhi ia ka jingkiew palat 221% ha ka jingdon ki briew ba ioh pang HIV / AIDS bad ka Myntri ka Koit ka Khiah Kong Ampareen Lyngdoh, kala ban jur ia ka jingdonkam ban iakren ia kane ka jingeh khlem da bishar iano iano ruh bad ban wad ia ki lad ki lynti ban tehlakam ia ka jingsaphriang jong ka jingpang.
“Ka don haduh 221.1 percent ka jingkiew ha ka jingdon ki briew ba pang HIV/AIDS haka Jylla ha kine ki 19 snem bala leit katba ka Tripura kala kot palat ia a 330%. Ngi donkam ban pynthikna ba kane kam dei ka mat ban pyndonkam ha kaban pynlehrain ia ka Jylla hynrei kine ki dei ki jingtip ki ba donkam ban leh eiei. Ka dei ka dak ka jingma bad kane ka dei ka kam kaba tang ka imlang sahlang ka lah ban iatreilang ha kaban tehlakam ia ka” ong ka Kong Ampareen haba iakren bad ki nongthoh khubor.
“Nga kyrpad ia ki MLA ba kin iawan ban iatreilang. Kiei kiei baroh lah ban leh hapoh ka jingialam jong ki Nongmihkhmat bala jied paidbah la phi dei u MLA ne MDC, wan shakhmat ban iasnohkti lang bad ban leh ia kaei kaba phi lah ban leh, iasyllok ia kane ka jingeh khlem da peitkhmat ne bishar. To ngin peit haduh katno ngi lah ban leh bad wad ia ka lynti ban lah leh eiei” kala bynrap.
Ka Myntri ka pyntip ba ka Sorkar kala sdang pyntreikam mynta da ka Integrated Health Campaign kaban iasyllok bad iathir iatai halor ka jingpang HIV/AIDS, kaba la buh dak jingma hapoh ka Jylla Meghalaya.
“Katto katne ki Shnong, ka imlang sahlang ki don hapdeng ka jingma kaba kham jur. Khlem ka jingithuh ia ki nongpang HIV/AIDS bad khlem da tuklar ia ka kam shimet kaba ki kwah ban pynpaw, ka Sorkar Meghalaya ka hap ban shim ia ki sienam ki ban lah tehlakam ia ka jingsaphriang jong ka HIV/AIDS” kala ong.
Hadien ba pyniaid ia ka jingialang iatai hapdeng ki Tnad Sorkar halor kane ka kam, ka kong Ampareen kala ong “Lada ka Tnad Social Welfare ka trei tang iala ka kam, ka Tnad Education kan trei tang iala ka kam bad ka Tnad ka Koit ka Khiah kan trei iala ka kam, haba kut ka sngi, baroh baroh kin nym poi sha ka thong. Ngi kwah ban iohi ban pynduna ia ka jingdon ki nongpang, ai ia ki jingsumar kiba donkam ia kine ki nongpang”.
