Shillong, Jylliew 17 : Ka Myntri ka Koit ka Khiah Kong Ampareen Lyngdoh ha ka sngi Ba-ar, kala ong ba ka Tnad kan ai ia ka jingpynsajia pyrshah iaki doktor/nos lada ka kaiphod jingtohkit ka pyni ba ka jingiap jong ka Longkmie ba armet dangshen ha Maternal & Child Health (MCH) Hospital, Jowai, ka dei na ka jingkhein sting jong ki.
“Ngi dang ap ia ka Committee ba kan aiti ia ka kaiphod sha ka Tnad. Lada don ka jingkhein sting, kito kiba donkti kin hap ban mad ia ki jingpynshitom” ong ka kong Ampareen haba iakren bad ki nongthoh khubor.
Kane ka Longkmie ba khlad ka kyrteng ka Kong Pynche Bareh ba na ka shnong Jalaphet, East Jaintia Hills. Kane ka Longkmie kala khlad ha ka 4 tarik Jylliew.
Ka kong Ampareen kala ong ba ki bahaiing ka kong Pynche kila leit mudui sha ka Iingkashari bad ka Meghalaya Human Rights Commission (MHRC) ruh kala pan kaiphod halor kanr ka jingjia.
“Ngin ia ap shuwa ia ka jingbishar, ngin ia ap bad sa ai ia ki jubab sha ka MHRC bad ngin sa peit kumno ka kam ka iaid nangne shakhmat” kala bynrap.
Ka Myntri ka pyntip ba kala dep ban thung ia ka Committee, kaba ka pynkhreh ia ki kaiphod bapher bapher ban aiti sha ki bor treikam bapher bapher, kiba la ioh pdiang ia ka mudui na ki bahaiing hasem.
“Ngi sngewsih jur ba kum kine ki jingjia kila wan jia bad kum ka Sorkar, ngi hap ban pynthikna ba kum kine ki jingjia kim dei ban nang jia biang hadien habud” kala ong.
 Hospital, Jowai, ka dei na ka jingkhein sting jong ki.){kind=link}