Nongpoh, Jylliew 14 : Ka Dorbar Shnong Umshangling, kala khang dam mynta la 3 sngi ia ka jaka theh niut jong ka sor Nongpoh kaba don hapoh u pud u sam ka Shnong, namar ka jingsieng palat pud ka jingsma iwtung sha ka shnong ka thaw naka daw ka jingbret pathar ia ki jaboh.
Ka Dorbar Shnong kala shim ia kane ka sienjam hadien ka jingud jong ki nongshongshnong ba ki skain kila wan boi sha ki iing ki sem, boi ia ka bam ka dih haduh bala ijli khait-kaba buh jingma wat ia ka koit ka khiah.
Kane ka jingkhang dam ka shnong Umshanglong kala buh mynta ha ka jingeh ia ki Shnong ki Thaw bad ki iew ki hat ka sor Nongpoh bad ia ki namar ka jingbym don jakashuh shawei ban leit bret ia ki niut.
Halor kane, ka Synjuk ki Rangbah Shnong ki phra shnong kiba hap hapoh ka Pahamrioh Circle lem bad ka Dorbar Shnong Umshangling, ha ka sngi Saitjain, kila iahiar jurip lang ia katei ka jaka theh niut bad lap ba ka rukom bret ia ki jaboh kala ktah shisha bad kala pynmih ruh ym tang ka jingsma iwtung hynrei ka jingboi skain.
Ia kane ka jingjurip la ialam da u Chairman ka Synjuk Bah Stephan Kshiar, Rangbah Shnong ka Umshangling Bah James Maiong, u Secretary Shnong Bah Vincent Sohkhwai, ki dkhot ka Synjuk lem bad ki Longkmie Longkmie ka shnong Umshangling.
Haba kren sha ki lad pathai khubor, u Chairman ka Synjuk bad ki Nongialam Shnong ka Umshangling, kila pyntip ba ka Synjuk ryngkat ka Umshangling, kila rai ban pyniaid shakhmat ia ka jingkhang dam ia kane ka jaka theh niut bad kin nym ailad satia ban wan theh niut ha katei ka jaka.
Kila kynthoh ba kane ka sienjam ka long kaba hap ban shim namar ka Sorkar bad ki bor District kila phai lyndet ia ka jing eh jong ki nongshongshnong bad ba kim don jingsngew shuh ia ka jingshah ktah u paidbah ha ka koit ka khiah bad kiwei kiwei.
Kila kynthoh ruh ia ka Nongpoh Town Dorbar ba ka jah bad sngap jar jar halor kane ka kam tad hadien ka jingkhang dam jong ka Shnong Umshangling.
Ka Synjuk bad ka Shnong Umshangling kila rai ban pynbteng beit ia ka jingkhang dam ia kane ka jaka theh niut katba ki bor Sorkar kim pat lah ban tehlakam ia ka jingbret niut pathar, ka jingsma iwtung bad ka jingboi skain.
