Shillong, Nailur 06: Ka Nongaiktien jong ka All India Congress Committee (AICC) ka Babeeta Sharma hynnin ka 5 tarik u Nailur, kala pynpaw iaka jingskhem jngmut ba ka seng hapoh ka jingialam u MP ka Shillong Bah Vincent H Pala kum u President ka MPCC ka don iaka kabu kaba biang ban wanphai biang haka bor ha u snem 2023.
“Ngi don ia u nongialam uba biang bha uba long ruh u MP bad hapoh ka jingialam ka jong u, ka Congress ka don iaka lad kaba biang bha ban wanphai haka bor haka jylla” ong ka Babeeta Sharma haba iakren bad ki nongthoh khubor.
Ka la ong, ba ka Congress kala duh tang khyndiat eh ban ioh thaw iaka sorkar ha u snem 2018 bad ka ngeit skhem ba mynta ka kynti, lyngba ka jingtrei shitom, ki paidbah sa shisien kin ai ka jingshaniah iaka seng Congress kumba ka seng kala leh bun kiei kiei naka bynta ka jylla Meghalaya.
“Kumno la thaw iaka jylla Meghalaya? Phi dei ban tip ba ka Meghalaya kadei kaba hap ha Assam. Mano kiba la shim iaka sienjam ban thaw iaka jylla Meghalaya, kadei ka Congress. Ka seng Congress ka phai khmat beit ia ki paid riewlum jong ki jylla ka thain shatei lam mihngi, ka buh ha dohnud naka bynta ka bha ka miat jong ki paid riewlum jong ka thain shatei lam mihngi bad dei halor kane ka daw la thaw ia ki jylla hadien. Kumta ki paidbah kim dei ban klet bad nga tharai ngi dei ban pynkynmaw iaki paidbah ia kiei kiba ka Congress kala dep ban leh. Ka i kumba ngi la klet bad ki paidbah ruh kila klet, kumta ngi kwah ban pynkynmaw biang ia ki sa shisien” ong ka Babeeta.
Haba kylli ba ki 17 ngut ki MLA ka Congress kila kynnoh ba ka jingkhyllem ka seng kadei namar ka jingshim rai ka AICC ban thung ia u President uba mynta, kane ka nongaiktien ka AICC kala ong “Nga tharai kane kadei ka jingjia kaba rim, kam lah ban dei ka dawbah bad katkum ka jingtip ka jong nga, kila dep ban iatylli bad ki iadonlang ha ka por ba u Rahul Gandhi u iakynduh ia ki, hynrei hadien kata u Mukul Sangma u la shim da kawei pat ka rai. Kumta ngam kwah ban kren eiei halor kane, hynrei ngin iaid shakhmat kumno ban pynkhlain iaka seng nangne shakhmat”.
Haba kylli la u Bah Pala yn long u kyrtong CM jongka seng ha u snem 2023, ka Babeeta kala ong” Ngam lah ban ong eiei ia kane, ngam da tip bha hi ruh bad kan shong ha ki nongialam kiba ha khliehduh jong ka seng ban shim ia ka rai ia kaei kaban sa jia”.
Kala ong pat ba u President ka MPCC yn long ka durkhmat jong ka seng Congress.
Halor ka jingkylli la ka Congress kan pdiang biang ia ki nongmihkhmat kiba la phet lada ki wanphai sha ka seng, kane ka noingialam ka la ong, ba ki nongialam ka seng ki kloi ban pdiang ia baroh lada ki wanphai biang sha ka seng.
“Ngi pdiang ia baroh lada ki wanphai biang bad ngin pyllait ruh da kaba laitluid ia kiba kwah ban mih noh, lada ki sngew ba ngim lah ban pynurlong ia ki mat treikam jong ka seng, hynrei nga tharai ba dei tang ka Congress kaba kren na bynta jong baroh, kaba ieng bad baroh, ka bym leh shilliang khmat iano iano ruh la kidei na kano kano ka niam ne rukom” ong ka Nongaiktien ka AICC.
Nalor kane, kala khot sngewbha ia ki seng sain pyrthei kiba iatreilang bad ka NPP bad BJP kiba sngew ba kam don jingmut eiei ruh em ban iatreilang bad kine ki seng.
“Ka Congress ka don bun bha ki lad hangne, Ngi la duh ban thaw iaka sorkar tang khyndiat eh. Kumta nga pdiang ia baroh ki seng sain pyrthei kiba sngew ba ka jingiatreilang ka jong ki bad ka NPP bad BJP ka long ka bym don jingmut, ki lah ban wan iatreilang bad ngi hashwa ne hadien ka elekshon ne da kumwei pat. Ka Congress kadei ka seng kaba heh bad kala ai jaka ia baroh hi” ong ka Babeeta.
Haba kylli la ka Congress ka kloi ban iatreilang bad kino kino ki seng naka bynta ka elekshon 2023, kane ka nongialam kala ong ba kane kan shong haka MPCC ban shim ia ka rai.
