Shillong,Nailur 06: U Myntri Sorkar ka Tnad pule puthi Bah Lahkmen Rymbui u la pyntip, ba ka Jylla Meghalaya kaba don tang 35 lak ngut ki Nongshongshnong, ka don haduh 55000 ngut ki Nonghikai bad napdeng kine, haduh 50000 ngut ki dei tang kiba hikai ha ki Skul katba 5000 kiba hikai ha ki College.
U Myntri ula pyntip ia kane ha ka jingrakhe ia ka sngi kyrpang ki Nonghikai ne Teachers Day ba long hynne ka sngi ha U Soso Tham Auditorium, Shillong.
U Myntri ula pyntip ruh ba dei tang ka Jylla Meghalaya kaba don haduh 25 jait (category) ki Nonghikai, kaba dei ka daw bah ba pynkha ia ki jingeh ba ha rukom mynta.
Haba buh dak jingkylli ia ka jingduna ka pule puthi ha ka Jylla, u Myntri ula ong “Lada khein ia ka jingdon jong ki Nonghikai bad ki Nongshongshnong, ka Jylla kam dei shuh ban duna ha ka pule ka puthi. Ngi don iwei I Nonghikai na ka bynta 60 hadu 65 ngut ki Nongshongshnong kata ruh khlem khein ia ki Khynnah skul”.
“Ngi dei ban pynjanai shuh shuh ia ka kam hikai bad ngi dei ban shim ia ka jingkitkhieh ha ngi iwei pa iwei khnang ba ka Jylla kan kiew shakhmat ha ka pule ka dangle”ong u Myntri.
Haba ai mynsiem ia ki Nonghikai kiba trei shitom bad ba pyndep thikna iala ka kamram, u Myntri ula ong “ 90 ne 95 % ki Nonghikai kiba da trei shitom shisha hynrei ki don ruh ki ba shu trei thohmut thohmat tang ban ioh tulop. Nga wer ia ki Nonghikai ba kin kren lem ia ki para nonghikai ba kin pyndep iala ka kamram namar kano kano ka kam ka wanlang bad ka jingkitkhlieh bad dei ruh ban pyrshang ban leh bha ia ka kam”.
Haba kren halor ka jingdon bun jait ki nonghikai (category), u Myntri ula ong “ Ka Meghalaya kala bunseh satang ki jait (category) Nonghikai bapher bapher ym tang 4 ne 5 jait bad kane ka dei namar ka jingbun seh jong ki skul kynthup ia kiba seng ka Sorkar, ki seng niam, ki shnong ki thaw, ki riew shimet bad ter ter.
Haba phai sha ka lawei ka kam hikai, u Myntri ula ong “Mynta ka jinghikai kam dei shuh tang na ka kot hynrei dei ban iarap ban btin lynti ia ki khynnah ba kin iaid nangne shakhmat bad ban pynrung ha ka jingmut jingpyrkhat jong ki khynnah pule ba ka pule puthi kadei ka jingim ym shuh tang ban iohkam iohjam”.
U Bah Rymbui u la kyntu ia ki nonghikai ba kidei ban saindur iaka sap ka phong jongki khynnah khnang ba ka sap ka phong kaba ki don kan pynlong iaki ban ieng ha kano kano ka bynta kaba ki don.
U Myntri ula ong ruh ba kam dei tang ka kamram jong ki nonghikai ban hikai ia ki khynnah hynrei ka iing ka sem ruh kadei ban don bynta lang ha kaban ai jinghikai khamtam haba mynta ka jingdih drok haka imlang sahlang kala jur bha bad ki nonghikai kidei ban long kum ki nongrah Tiensyiem ban rat dyngkhong ia ki kam sniew bad ban tei iaka imlang sahlang kaba thymmai.
