Guwahati, Jylliew 11: Ka met iap jong kawei ka samla 26 snem Rosmita Hojai, kaba dei na ka shnong Hojai, Dima Hasao district, Assam, la lap ha ka sngi ba-ar najan ka wah ha Pauri Garhwal district jong ka jylla Uttarakhand hadien ka jingjah rngai naduh ka 5 tarik u Jylliew.
Katkum ki khubor Pulit, la iathuh ba ka Rosmita kala leit sha Delhi ban leh ia ka eksamin jong ka Railway Recruitment Board (RRB). Kane ka dei ka samla ba pule engineering barim ha Haryana, bad ha kine ki khyndiat sngi ka Rosmita ka dang pynkhreh ban ïakhun ia ka Assam Public Service Commission (APSC) exams ha Guwahati.
Kane ka samla kala iathuh sha ki bahaïing ha ka 4 tarik jylliew ba kan leit sha Delhi. Hynrei ha ka janmiet jong ka 5 tarik kala phone ia ka kmie ba kala wan phai noh hi da ka rel, ka rai kaba pynkyndit bad sngewpher, kaba la pynmih ruh ia ka jingtharai sniew.
Hadien ba la lap ia ka met iap jong ka ki pulit kila pynlong ia ka jingtohkit kaba jur bad kila kem ia ar ngut ki briew ban kylli jingkylli. Kine kiba la shah rah ha ki pulit la tip kyrteng kum u Hemant Sharma ba na Mohindergarh, Delhi bad u Pankaj Kokar na Rohtak, Haryana.
Ia ka met jong kane ka samla la rah noh ban leh post mortem bad ka jingtohkit kala iaid shakhmat ban lap ia ka jingshisah halor ka jingiap jong ka.
