Shillong, Jylliew 09: Ka Meghalaya BJP hynne ka sngi ka khublei ia ki pulit ka Jylla hadien ka jinglap iaki sakhi sabut halor ka jingshah pyniap dang shen ia uwei u nongjngohkai pyrthei na Indore uba dang shu dep iathoh bad wan leh honeymoon sha Sohra.
Ha ka kyrwoh, u nongaiktien ka Meghalaya BJP u Bah Mariahom Kharkrang u la ong, “Ka jingshah pyniap dang shen jong uwei u nongjngohkai pyrthei uba dang shu iashong kurim na Indore haki thain Sohra, kala wanrah ka jingkyndit hapoh ka Jylla bad ka ri baroh kawei hynrei naka liang ki Pulit ka Jylla ki la lah ban kem iaki ba suba donkti. Ka BJP Meghalaya ka ai khublei ia ki pulit khamtam ia u SP Bah Vivek Syiem, NDRF, SDRF, ka kynhun Adventure Club Sohra bad kiwei kiwei kiba ïaleh shitom khlem shongthait da ki sngi ban wad ïa ki arngut kiba la jah.”
Lyngba kane ka jingsdang paw ki sakhi sabut, u Nongaiktien ka BJP u la ong ki pulit Meghalaya ki la pynshisha biang ia lade ba ki dei kawei na ki bor ba tbit tam ha ka ri.
“Ngi sngewthuh ba ki pulit jong ka jylla bad ki kynhun wad bniah ki la hap ban trei hapoh ka jingpynbor kaba jur bha haba pyrkhat ïa ka jingshah pynjah burom ha ki katto katne ki National Media bad ki riew shimet hynrei ki Pulit, SDRF, NDRF bad kiwei kiwei kila ieng skhem ban leh iaka ba donkam bad ioh kem iaka Sonam Raghuvanshi lem bad iaki ba suba donkti ban pyniap ia u Raja Raghuvanshi” u la ong.
U Bah Kharkrang u la ong, “Ka jylla jong ngi ka dei kawei na ki jaka ba itynnad tam ha ka ri, ka dei ruh kawei na ki jaka ba don ka jingsuk jingshngain. Ka Meghalaya kadei ka Jylla kaba kiwei ki Jylla ka ri ki hap ban bud nuksa halor ka jingshngain ki kynthei”.
“Hynrei, ki katto katne ki national media kim shym la pyrkhat arsien ban pynbudnam ïa ka jylla jong ngi da ki kyntien kum ‘crime prone hills’. Ngi kyrmen ba kine ki national media mynta kin pdiang ïa ka jingbakla jong ki bad kin pynshai paidbah halor ka jingbakla jong ki” u la ong.
U Bah Kharkhrang u la kyntu iaki lad pathai khubor ba kin treikam ha ka rukom kaba don jingkitkhlieh bad ban pynshisha ïa kino kino ki jingjia hashuwa ban pynmih khubor.
Kumjuh ruh ka Meghalaya Pradesh Congress Committee (MPCC) ka la ai khublei ia ki pulit ka Meghalaya kiba la trei shitom ban sei madan ia ka jingshisha halor ka kam pyniap ia u Raja Raghuvanshi.
“Ka jingaiti lut bad ka jingtbit jong ki pulit ka Meghalaya kala sei madan ïa ki nongleh kam sniew, kaba pyni ïa ka jingshimkhia jong ki kaba khlem artatien ban bat ïa ka aiñ. Ka jingaikhublei kyrpang ïa ki ophisar, ki nongtohkit, ki nongthoh khubor, ki riewpaidbah ha ka imlang sahlang” ong u secretary ka MPCC u Bah Manuel Badwar ha ka kyrwoh.
U Bah Manuel ubla ong ba kane ka jingjop kam dei ban jah noh khlem da tip hynrei ka pynshisha ruh ia ka nam jong ka jylla pyrshah ia ki jingkynnoh khlem nongrim bad ki jingiathuhkhana pynjah burom ba la pynphriang da ki katto katne ki National Media.
