Shillong, Jylliew 09 : U Symbud Myntri Rangbah ka Jylla Bah Prestone Tynsong ha ka sngi Nyngkong, ula iathuh ba ka Sorkar Jylla kala bthah ia baroh ki trai Hotel bad ki Homestay ba kin da buh jingthoh ba bniah bad ka jingpynrung kyrteng ia ki nongwanshangkai kiba wan sha Jylla.
Kane kala mih hadien ka jingshah pyniap uwei u nongwan leh honeymoon ba na Indore, u Raja Raghuvanshi ha Sohra.
“Ngam ong ba ngim pat don satia ia kane ka rukom treikam ha Jylla. Ngi la don. Hooid ngam ong ba ka dei kaba biang shi spah na ka shispah. Ngi nang pynkhlain shuh shuh ha kito ki jaka kiba donkam ban pynkhlain. Ha ka jingshisha, ki jingbthah kila mih na ka tnad Jngohkai ba iadei bad ka jinglum kyrteng ia ki nongwan shangkai bad ngi la dep bthah ruh ia baroh ki Homestay bad ki Hotel ban pynthikna ba ki dei ban da lum kyrteng bha. Ngi la dep bthah ia ki da kaba shai ba ki dei ban da lum ia ki kyrteng bad ki jaka sah, jaka ba ki wan jong baroh ki nongwan shangkai” ong u Bah Prestone.
“Ha ka jingshisha, ngi la don ruh ia ka ain. Ka Tourism Act kala treikam bad lyngba kane ka Ain, ki lah ban phah ia ki kot ki sha ki Police Station lane sha u SP lane sha kano kano ka jaka ba donkam ban phah” ula ong haba ban jur ia ka jingdonkam ba baroh ki kynhun ba trei ia ka kam jngohkai kynthup ki Dorbar Shnong ba kin iadon bynta lang ha kine kiei kiei baroh.
U Bah Prestone ula ong ba da ka jingtohkit ba khlem sangeh bad ka jingiatreilang jong kiba bun ki Jylla, lai ngut ki briew la ioh ban kem ha ba iadei bad kane ka case- arngut na Indore (Madhya Pradesh) bad uwei na Lalitpur (Uttar Pradesh).
“Kine ki jingkem ki pyni ia ka jingkylla kaba khraw ha ka sei madan ia ki jingjia kiba don sawdong jong ka jingiap ba shyrkhei jong u Raja Raghuvanshi bad ka jingjah rngai jong ka kurim, ka Sonam Raghuvanshi” ula ong.
“Ka Sonam Raghuvanshi kala leit ban pyndem dalade hapoh ka Nandganj Police Station ha Ghazipur District, Uttar Pradesh bad ia mynta ka don hapoh ki kti jong ki Pulit ka Uttar Pradesh. Ki pulit kila bud ia ki kyndon treikam ban ioh wan kit noh ia ka sha Shillong bad ban pynlong ia ka jingtohkit” ong u Bah Prestone.
U Symbud Myntri Rangba ula ong ba une u soh u dei uba mih na ka jingpyrshang ba man ka sngi jong ka Special Investigation Team (SIT) ka Jylla, bala kyrshan da ka State Disaster Response Force (SDRF), National Disaster Response Force (NDRF), ki bor syntiat ka thain bad ki tnad pynjari ain ha kylleng ki Jylla ka Ri.
Haba kylli la ka Sorkar kan ujor da ka mukotduma pynmynrain khmat ia kito kiba pynthohbria ia ka Jylla, u Bah Prestone ula ong “Ia kane ngin sa iapeit kumno ka iaid ka kam namar ia mynta, sngewbha wat nym pat rai kut naba ka jingtohkit ba shisha ka dang shu sdang”.
Hynrei ula kubur ba ka Sorkar Jylla kala sngewmong bha halor ki jingshah kynthoh ha ki social media bad ki khubor ba pynmih da ki National Media ba pynman ia ka Meghalaya kum ka ktem ki riew bymman.
“Hynrei ha ngi hi nga shim ba lehse ka mih na ka jingsngew myllung, namar ka jingsngew kutlad lane lehse kim lah ban tehlakam ialade lane ki shu kwah kren khlem kano kano ka jingmut” ula ong.
Haba pynpaw ba ka Meghalaya ka dei ka jaka kaba shngain ia ki nongwan shangkai, u Bah Prestone ula ong “Ka Kynhun pulit jong ngi ka dei kawei na ki Kynhun ba biang tam hapoh ka Ri, nga tharai phi la iohi hi dalade bad ngi la pynshisha ia kata bad ym tang katta, phi kynmaw ia ki 15 snem mynshuwa ia ka jingjur ki kam kaikhlaw bad kumno ngi tem ia ki. Ki Pulit jong ngi ki dei kiba biang tam. Ngim donkam ia ki shipai ne ki bor pahara na ka Sorkar Pdeng hynrei ngi lah ban tehlakam hi dalade. Namata kata, kaei kaba nga kwah ban kyntu ia baroh ki briew ha India lane shabar ka India ba sngewbha wat shim ia kane ka khubor la ka dei na ki social media ne ki national news kumba ki long namar ka Meghalaya ka dei ka jaka kaba shngain bad mynta mynta nga dei ban ong ba ki nongwan shangkai kila tuid sha Meghalaya manla ka sngi. Nga thikna ba lyngba ka jingtbit treikam ki Pulit ka Meghalaya, kan nang ai mynsiem ruh ia kiwei ba kin wankai sha Meghalaya bad Shillong” ula bynrap.
