Shillong, Jylliew 09 : Ka jingtrei khlem shongthait bad ka jingstad treikam jong ki Pulit ka Meghalaya ha kaban ioh kem ia ki lai ngut ki runar ba donkti ban pyniap ia u Raja Raghuvanshi, u nong Indore ba wan leh honeymoon bad ka kurim sha Sohra, kala ioh ia ka jingiaroh kaba tuid na ki riewpaidbah khamtam ha ki rynsan social media.
Ki Nongshongshnong na kylleng ka Jylla bad shabar ka Jylla ruh kila thoh ha ki rynsan social media bapher bapher ban ai jingiaroh ia ka jingtbit bad jingsted treikam bala pyni da ki Pulit, khamtam u Superintendent of Police ka East Khasi Hills Bah Vivek Syiem bad ka kynhun jong u.
Kane ka jingjia, kaba la pynmih ia ka jingbitar ha baroh kawei ka Ri bad kaba la pynmih ia ki jingkynnoh ba lai phew jait lai phew rukom-kynthup ka jingkam ba ki trai shnong ki donkti ha kane ka kam-kala kylla pynban da khongpong da ka jingioh kem ia ki briew kiba donkti. Kine ki jingkem kila lam sha ka jingpyndem jong ka Sonam, ka kurim u Raja Raghuvanshi, ia kaba ki Pulit ki kynnon ba ka dei ka nongsuhbuit ban pyniap iala u kurim.
Ka Sonam kala leit ban pyndem ialade hakhmat ki Pulit ka Nandgank Police Station, ha Ghazipur, Uttar Pradesh.
Kiba bun ki nongpyndonkam social media kila pynpaw ia ka jingsngewtynnad ia ka kynhun ba tohkit, haba iaroh ia ki da ki hashtag kum #KudosToMeghalayaPolice. Uwei u nongleh social media ula ong “ Ki Pulit ka Meghalaya ki leh da ka kam, ym ba shu heh tang ka nia”.
Napdeng kito kiba ioh jingiaroh ki kynthup ruh ia ki tourist guide kiba la ai ia lai tylli ki jingtip ba kongsan sha ki Pulit. Kawei ka nongleh social media kala ong “Jin ba ki tourist guide kim lah ban ai ia ki jingtip ba kongsan ha katei ka por, kine ki nongleh bymman kin jin da ioh iaid lait luid….u dei hok ban ioh ia ka khusnam-lane boksis-na ka Iing u Raja”.
Ki jingpynrem kila mih ruh pyrshah ia ki katto katne ki National Media halor ka jingpyni ia ka Meghalaya kum ka thain kaba jyllei ki kam bymman. “Mynta ki nongai khubor, kiba pyni ia ka Meghalaya kum ka jaka ba sniew, iathuh ialade ba phi dei ba kumno : Kudos ia ki Pulit ka Meghalaya” kila ong.
Kane ka jingjia kala pynmong ruh ia kiba bun ki briew na ka thain Shatei Lam Mihngi, ym namar ka rukom pyniap kaba shyrkhei hynreinamarka jingialam bakla ki National Media kiba la pynthohbria ia ka nam jong ka Jylla bad ki nongshong shnong.
Ha kajuh ka por, ka jingtohkit kala pynpaw ba ka Sonam dalade kala suhbuit ban pyniap iala u jong u kurim namar ka jing don jingiadei bad uwei pat u briew. Ki Pulit ki suba kala iasuhbuit bad ki runar ha kane ka jingwan leh honeymoon sha Meghalaya. Katba ki bahaiing kila kam ba ka jingiathoh shongkurim ka dei kaba la pynbeit da ka jingmynjur jong ka, ia kane ka bynta ruh mynta ka dang don hapdeng ka jingtohkit da ki bor Pulit.
U DIG Eastern Range Davis Marak ula pynthikna ba ki Pulit ki dang wad sa ia u briew uba saw, uba donkti lang ha kane ka kam bad ka jingkhynra mynta kala iaid ha Madhya Pradesh bad Uttar Pradesh.
