Shillong, Jylliew 09 : Ka jingshah pyniap u Raja Raghuvanshi ba na Indore, Madhya Pradesh ha ka jingwan leh honeymoon ha Sohra, kala kylla long kum ki jingjia Crime Patrol, da ka jingwan pyndem hi dalade ka kurim kaba la jah rngai hynnin ka miet sngi U Blei ha Nandganj Police Station, ha Ghazipur, Uttar Pradesh.
Da kane ka jingwan pyndem, ki Pulit kila ioh kem ia baroh lai ngut ki runar- arngut lah kem na Indore bad uwei na Uttar Pradesh-haba iadei bad kane ka jingjia.
Kane ka jingjia kala pynkyndit ia ka Meghalaya, ka Jylla kaba iabna baroh ia ka jingsuk, ka jingshngain bad ka jingburom ia ki nongwan kai khamtam ha ki jaka jngoh kai ka Sohra bad Nongriat.
Shibun ki khana kila mih halor ka jingjah rngai kane ka kurim, ba kynthup naduh ka jingkhaii briew ba kynnoh donkti ia ki trai shnong. Hynrei, ki trai shnong bad ki bor Sorkar kim shym la pdiang satia ia kane ka khana bad ieng skhem ha ka nongrim ba kum kine ki jingjia ki dei ki bym pat ju jia koit hapoh ka thain.
U Myntri ki kam jngohkai Bah Paul Lyngdoh dang shen ula kyntu ia ki National Media ba kin kiar na ka jingai khubor ba bakla bad pynjah burom ia ka Jylla, haba mana ba kane ka jingai khubor lamler ka lah ban ktah ia ka nam ka Meghalaya kum ka jaka jngohkai kaba shngain tam.
U Raja bad ka Sonam, kiba dang shu dep iathoh na Indore, Madhya Pradesh, kila wan poi ha Shillong ha ka 21 tarik Jymmang ban leh honeymoon. Ha ka 22 tarik Jymmang, kila leit kai sha Sohra bad ha ka sngi kaba bud, kila leit iaid kjat sha Nongriat, ka jaka ba don ka Jingkieng diengjri ba armala. Ka jingiakren bad ki bahaiing hasem kala kut khatduh eh ha ka 23 tarik Jymmang.
Ki bahaiing u Raja kila ujor ia ka jingjah rngai, kaba la lam sha ka jingiawad paidbah ha kylleng ki jaka. Hynrei namar ka jingjynjar ki jaka namar ka jingriat bad lhuh bad ka jingrben ki khlaw, kala buh hapdeng ka jingeh ia ki kynhun ba leit wad. Hynrei wat hapdeng kane, ka kynhun ba kynthup ia ki Pulit ka Jylla, ka SDRF, NDRF bad ki trai shnong, kila lah ban lap ia ka met bala kem pyut jong u Raja ha ka 2 tarik Jylliew.
Ka jingiawad kala nang jur da ka jingwan poi ki bahaiing u Raja bad ka Sonam sha Shillong. Katba ki bahaiing u Raja kila dawa ban tohkit CBI, ba kynnoh ia ka jingsuki treikam ki Pulit ka Jylla Meghalaya, ki bahaiing ha Sonam kila buh dak jingkylli ia ki bor Sorkar ba kim dei ban khein ba kala iap. Ha kawei na ka khep, u hynmen ka Sonam ula buh jingkylli ruh da kaba ong “Balei ki Pulit ka Meghalaya ki pynman ba ka Sonam kala iap?.
Ka jingwan pyndem ka Sonam bad ka jingiohkem ia ki laingut ki runar kala lam sha ka jingseisoh na ka jingtohkit. Watla ki Pulit kim pat iathuh ia ki jingthmu ha lyndet ka jingpyniap ia u Raja hynre ka jingwan pyndem jong ka kurim, ka pynsuba jur ia ka jingdonkti jong ka ha ka jingiasuhbuit ban pyniap ia la u kurim.
Ki Pulit ka Jylla Meghalaya, hapdeng ki jingtynjuh kiba bun, kila pyni ia ka jingtbit jong ki ha ka jingtohkit da kaba lapdien ia ki suba runar kiba la don sha kiwei pat ki Jylla.
Uwei u Heh Pulit ula kynthoh “Ha ka jingjia ba kum kine, kam long satia kaba iahap ban shu iasam lut ia man ki jingtip ba ioh lum bad ki lad pathai khubor ne ki bahaiing hasem. Ka jingiai shah ka dei u shabi?.
U Myntri kam pohiing ka Jylla Bah Prestone Tynsong un sa ai jingkren sha ki lad pathai khubor mynta ka janmiet bad ban pynbna syndon ia kiei kiei baroh halor kane ka jingjia.
