Shillong, Jylliew 09 : Ki Pulit ka Jylla kila suba jur ba ka Sonam Raghuvanshi, kala aiwai ne ai contract sha ki runar ban pyniap ia la u kurim ba ka iathoh u Raja Raghuvanshi, haba suba ruh ba kane ka briew ka lah ban don ka jingiadei ne shonglok bad uwei pat u briew.
Ki Pulit ka Jylla kila poi hynnin ka miet sha Indore, Madhya Pradesh bad la ioh jingtip ba kin wan ialam ia ka Sonam bad ia ki laingut ki runar ba donkti ban pyniap ia u Raja Raghuvanshi, sha Shillong mynta ka sngi.
U Deputy Inspector General of Police (DIG) ka Meghalaya, Davis Marak haba kren ha kawei ka lad pathai khubor ula iathuh ba ha ka jingtohkit, ki Pulit kila ioh jingtip ba ki don ki briew kiba wan nabar ka Jylla sha Meghalaya bad halor kane ka jingtip bad ka jingioh sakhi, la kem ia uwei u briew na Lalitpur, Uttar Pradesh hynnin ka miet bad kem sa arngut ki runar na Indore, Madhya Pradesh hynne ka step phyrngap.
Une u Heh Pulit u iathuh ba dei hadien ka jingiohkem ia kine ki briew, ba ka kurim, ka Sonam Raghuvanshi, kala pyndem ialade hakhmat ki Pulit ha Nandganj Police Station, Ghazipur District, Uttar Pradesh.
U iathuh ba haba sdang ka jingtohkit, la paw ba ka kurim kala aiwai ne ai contract ban pyniap iala u jong u kurim bad ka don ka jingiadei/shonglok bad uwei pat u briew. Kane ka dei ka daw ha lyndet ka jingpyniap ia u Raja.
Ka kyrwoh na u Asst Inspector General of Police, SR Marak ula pynbna ia ka jingseisoh ka jingtohkit halor ka jingjah rngai ki shikurim ba na Indore, kiba wan leh honeymoon ha East Khasi Hills District ha u bnai Jymmang 2025.
Une u Heh Pulit u pyntip ba ka Sonam Raghuvanshi ka don mynta ha ka kti jong ki Pulit ka Uttar Pradesh bad ki Pulit ka Jylla kila pynbit pynbiang lut ia baroh ki jingdonkam ban ioh wan ialam noh ia kane ka briew sha Shillong.
U Marak ula ong ba une u soh u dei ula mih na ka jingtrei shitom jong ki Pulit Special Investigation Team (SIT), bala kyrshan lang da ka State Disaster Response Forse (SDRF), National Disaster Response Force (NDRF), ki nonglum khubor syntiat bad ki bor ka ain na kylleng ki Jylla.
“Wat hapdeng ki jingtynjuh kiba bun na ka jinglong ki jaka ha Sohra, ka jingshah bishar ha ki paidbah bad ki lad pathai khubor, ka kynhun jong ngi kala ieng skhem ha ka nongrim ban bat bad iaid kat kum ka lynti jong ka ain”.
