Shillong Jylliew 05: U Myntri Rangbah ka jylla u Conrad K Sangma ha ka sngi Balang ula iengskhem halor ka jingdonkam ban wad ia ki lad ban shimkhia ia ka jingsngew jong ki paidbah ha kaba iadei bad ka jingwan rung kyrthep ki briew kiba nabar bad ban plie lynti ban pyntreikam ia ka projek rel ha ka jylla.
Haba kyntait ban kren eiei halor ka jingrai ki seng kiba don ha ka Liang Pyrshah ban ym iashimbynta ha ka jingialang jong ka All Party Committee halor ka Railways kaba la thaw da ka sorkar, u Conrad ula ong, “Ngam da tip shisha ia ka nongrim ka jongki hynrei ia ngi ka long kaba khuid ba suba bad kaba shai kdar (ia ka nongrim ka jongki)
“Nga lah iengskhem beit ha ka nongrim naduh ka sngi kaba nyngkong ba ia ka rel ha ka lynti kaba jngai ha ka ioh ka kot ka long kaba donkam bha ia ngi. Ka jingkit ia ki marbam mardih, ka jingkit ia ki mar ki mata bad kiwei kiwei shapoh jong ka jylla bad shabar ka jylla ka long kaba kongsan bad ka rel ka lah ban long ka bynta kaba kongsan bha” ula ong.
“Hynrei ki don pat ki jingpynsngew kiba shong nongrim bha kaba dei ha ka liang jong ka jingwan rung ki briew bad kiwei kiwei ki mat kaba ktah ia ka jingsngew jong ki paidbah. Mynta ngin lah ban wad ia ki lad ki lynti ban shimkhia halor kitei ki jingsngewkhia jong ki paidbah bad ban iaid na ka bynta ka roi ka par ha ka ioh ka kot kaban long ka jingkylla kaba khraw ia ngi? Nga tharai ka long kaba kongsan bha ban iatai, hynrei lada phim kwah ban iakren ia katei, ngam don eiei ban ong” la ong u Conrad.
Katkum ka jingong ka jongu, ka All Party Meeting kan sa long noh shen.
