Shillong, Jylliew 03 : U Superintendent of Police ka East Khasi Hills Bah Vivek Syiem, ula pynthikna ba u Raja Raghuvanshi u shah pyniap bad hynne ka sngi Ba-ar, ki Pulit kila ioh ban tam ia ka wait ba pyndonkam ban pyniap ia u na kshaid Weisawdong.
U Raja Raghuvanshi, ia uba ka met bala kem pyut la lap na ka riat bah ha Kshaid Weisawdong, ula jah rngai bad la ka jong ka kurim ka Sonam Raghuvanshi, ha ka jingwan leh honeymoon sha Sohra.
“Ngi ,la iohtam ia ka wait. Ka dei ka wait thymmai bad ka dei kaba la pyndonkam tang ia kane ka kam (pyniap)” ong u Bah Vivek haba iakren bad ki nongthoh khubor.
Haba pynpaw ba kala shai kdar ba ka dei ka kam pyniap, ula ong “ Une u briew (Raja) u shah pyniap. Kam don jingkylli pat da kumwei bad ngi la register case ruh ba shah pyniap bad ka jingpynjulor ia ki sakhi. Kam don jingartatien ba ka dei ka jingpyniap. Ngi hap ban wad ia kiei ki daw ha lyndet kane”.
Une u Heh Pulit ka District ula ong ba ia kane ka case la shimkhia hakhmat eh bad ka kynhun Special Investigation Team (SIT) bala khlieh da u SP (City) Herbert Kharkongor, kala pyniaid shaid shaid ia ka jingtohkit halor kane ka kam.
Ia u Bah Kharkongor la iarap lang da saw ngut ki Deputy Superintendent of Police (DSP)-DSP (Crime), DSP (City), DSP (Operation) bad SDPO Sohra- nalor arngut ki Sub-Inspector.
Haba kylli, u Bah Vivek ula ong ba ki Pulit ki dang ap mynta ia ka kaiphod jong ka post mortem ban pynthikna la u Raja ula iap shuwa ban shah bret sha riat lane hadien ba la bret ia u shapoh ka riat.
“Ngim pat lah ban ong la ula shah pyniap lypa lane u iap hadien bala bret ia u hynrei hadien ba ngi la ioh ia ka kaiphod post mortem, ngin sa lah ban pynthikna, la ki dak mong ki dei kiba lam sha ka jingiap hashuwa ban shah bret lane u dang im bad sa shah bret, ngin sa tip na ka post mortem”.
Nalor kane, une u Heh Pulit ula ong “Ngim pat lah ban pynthikna satia, kumta ai ba ki sakhi kin wan bad hooid, ka tiar ka dei kaba pyndonkam ban pyniap. Ngin hap ban wad mynta la ka dei ka kam lute lane ka jingkput lane don kano kano ka jingiashun lane kino kino ki kam kaba long hapdeng ki nongleh bad une u lanot. Ngi hap ban khmih shuh shuh ia ki sakhi bad hadien kane ngin sa lah ban ong eiei hynrei ia mynta ka dang kloi palat ban ong”.
Ha kajuh ka por, u Bah Vivek u pyntip ba ia ka kurim, ka Sonam, ym pat lapdien satia bad ka jing iawad kan dang bteng.
“Lashai ka sngi, ngin sa sdang biang ia ka jingiawad ha ki jaka ba marjan namar kane ka riat ka dei kaba jrong, kumta ngin sa iawad ia kine ki jaka baroh, kaba long kumba 1 lane 2 kilometer na ka jaka ba lap ia u Raja” ula ong.
