Imphal, Jylliew 3: U lapbah ba jur uba la lyngshop hapoh ka jylla Manipur ha kine ki saw sngi kiba la leit, kala wanrah iaka jingshlei ba shyrkhei bha ha kylleng ki jaka jong ka jylla ha kaba palat 19 ngut ki briew kila shah ktah bad ka jingshah pynjulor ia ki iing briew ka long 3,365 la iathuh ki heh ophisar ha ka sngi Nyngkong.
Ha kane ka jingshlei um, bad lyngba ka jingtuid jong ka um na ki wah kala pynpra bad pynjot ia ki kynroh bad shlei um ha kiba bun ki bynta jong ka Imphal East district, bad ki don kumba lai tylli ki constituency kiba la shah jur bha na kane ka jingshlei um kum hapoh ka Heingang, Wangkhei bad ha Khurai constituencies. Katba ha Senapati district kaba don ki bynta lum kadei kaba la shah kath jur bha na kane ka jingslap.
Na ka liang ki bor pyniaid jong ki District kila iathuh ba kila buh haduh 31 tylli ki relief camp ne ki ktem rieh tngen ba shipor bad kiba kham bun kidei hapoh ka Imphal East, ban ai jaka shong jaka sah ia kito ki briew kiba la shah pynkynriah na ka daw jong ka jingkiew jong ka um ha ka por ba shlei um, ki bor pyniaid district kila pyntikna ruh ba ki don haduh 47 tylli ki jaka ba twa ha kylleng ki jaka jong ka district ha ka por bat her bha u lap bah.
Ki don shibun ki jaka hapoh ka nongbah Imphal, ha kaba bun ki jaka ka um ka lah sahkut badka wah Imphal kala rat ia ki kynroh ha Khurai, Heingang bad ha Checkon, bad tuid sha ki jaka ba shong basah ki briew bad kumjuh ruh sha ki jaka iew.
Ki jaka tei ba kongsan kum ka All India Radio Imphal complex bad ka Jawaharlal Nehru Institute of Medical Sciences (JNIMS) ba la pyniaid da ka sorkar jylla kala shah ktah bha ha kane ka jingshlei um.
“Ka jingiad bad tuid jong ka um kala pynthut bha ia ka iaid ka ieng jong ki paidbah bad kaba la ktah jur ruh ia ka jngim ba man la ka sngi. Ki lad jingiarap ba long kyrkieh la leh na ka bynta ban weng ia kane ka jingeh” la iathuh ki ophisar.
Ki kam ai jingiarap bad jingpyllait im ki dang iaid shakhmat, ha kaba ki bor pyniaid ki dang buddien bha ia ka jingkiew jong ki um hapdeng ki jingkhein lypa ba u slap un dang bteng ban ther.
