Shillong, Jymmang 02: U Myntri Rangbah ka Jylla u Conrad K Sangma, hynne ka sngi Nyngkong ula leit iashimbynta ha kaban phah ia ka kynhun ialehkai Football ka Jylla U-20 Boys’ na ka bynta ka Elite Training Camp ha Olympique Lyonnias Training Academy, Lyon, France naduh ka 5 tarik haduh ka 25 tarik u Jylliew 2025.
Haba iakren ia kane ka kynhun ialehkai kaba don 28 ngut ki nongialehkai, u Myntri Rangbah ula ong, ka Meghalaya ka don ia ka kabu kaba biang bha na ka jingdon ia ka jingkhlain jong ki samla bad ka sorkar ka pyrshang ban saindur ia kane ka bynta, da kaba kynshew tyngka ha ki prokram kiba iadei bad ki samla.
“Haba ki kot ki sla (File) na ka bynta kane ka prokram kala wan sha nga, nga la soi ia ka khlem kano kano ka jingartatien watla ka jinglut jingsep na ka bynta kane ka prokram ka long T.2.80 Klur namar ba kane kam dei tang ka jingpynlut hynrei kadei ka jingkynshew pisa” ula ong.
Ula pynshai shuh shuh, ia ka rukom kynshew pisa ka sorkar ha kaba iadei bad ki samla, da kaba ong, “Lada don napdeng jong phi kiba ioh ban ialehkai ha ka ISL ha ki snem ban wan, kumta yn ioh biang ia katei ka jingkynshew pisa kaba ngi la bei ha phi iwei pa iwei lyngba kane ka prokram tang ha kawei ka samoi jong ka ISL bad kane kadei kaba nga iohi ia ka rukom treikam ban phah ia kane ka kynhun sha Lyon France ban ioh jinghikai 20 sngi, kadei ka jingkynshew tyngka bad ka jingkynshew tyngka na ka bynta ka lawei jong ka jylla Meghalaya.”
U Myntri Rangbah ula ong ruh ba ka jylla ha ki katto katne snem kan don kumba 50 tylli ki madan Artificial Turf bad ka Stadium kaba heh tam hapoh ka ri.
“La kadei ban tei ia jinglong ne jingtbit jong ki nongialehkai ne ki jingtei kum ki Stadium bad Madan Artificial Football Turf ne ban kyrshan ia ki Football Club ne ki Association kadei shi bynta jongka jingiohi jngai kaba ngi don na ka bynta ka lawei jong ki samla bad ka jylla” ula ong.
Haba iakren bad ki nongialehkai kiban leit ban ioh jinghikai pyntbit, ula kyntu ia ki ba kin shim thikna ia kane ka kabu bad ba kin da pynleit jingmut bha.
“Ha man la ka khyllipmat ka jong phi haba phi don shathie, pynkynmaw ialade ia kane ka kabu kaba phi ioh bad ban kurup ia ka kabu kaba rit tam ban ioh jinghikai, ban shemphang bad ban sam lang bad ban ioh mynsiem ban trei shitom ban kynjoh sha kaba bha tam” ula ong.
Ha kane ka jingialang la iadonlang u Richard Yangtham, IAS, Joint Secretary, Sports and Youth Affairs, Saloni Verma, IAS, Executive Director, MBMA, u Bah Hamlet Dohling u President jongka Meghalaya Football Association, u D.D Shira u Director jong ka Sports and Youth Affairs bad kiwei kiwei.
Kane ka kynhun kaban leit pyntbit ha Lyon kadei kaba la lum bad thaw da ka jingiatreilang bad ka Directorate of Sports bad ka Meghalaya Football Association bad kane ka kynhun kala iaid lyngba ruh ia ka Coaching Camp ha madan SSA mynta la palat ia ka shi bnai bad la thaw ruh ia ka kynhun kaba la wan iashimbynta ha ka U-20 Nationals ha Chattisgarh bad kane ka kynhun kala ialehkai bha bad poi sha ka semi final ha ka sien kaba nyngkong ha kum katei ka rynsan iakob ialehkai.
Ia kane ka kynhun yn ialam da u nongap bak u Rimankhraw Kharumnuid kum u Kapten.
Ia kane ka International Exposure Football Training Camp ha Lyon la pynlong da ka Indo French Sports Association kan wanrah ia ka jingtbit bad jingshemphang bad ia ki kabu kiba bun bad ki jinghikai ha ka pyrthei jong ka jingialehkai football.
