Shillong, Jylliew 02 : Ka State Education Mission Authority of Meghalaya (SEMAM), hapoh ka Samagra Shiksha, ha ryngkat ka jingiatreilang bad ka Indus Action, kila pynlong ia ka prokram ban pynsngewthuh bad ai jinghikai ki ban pynthikna ba ki Khynnah kiba wan na ki longiing ba duna ka jingioh kin ioh jaka lem ban pule ei ha ki skul shimet.
Kane ka prokram kaba la long naduh ka 27 tarik Jymmang haduh ka 30 tarik Jymmang ha DERT Annexe, Shillong, kala pynleit jingmut eh halor ka jinglah pyntreikam bha ia ka kyndon 12 (1)(c) jong ka Right of Children to Free and Compulsary Education (RTE) Act, 2009.
Ha ka jingialang plie la wan ban iashimbynta da ki Heh Ophisar ka Jylla ba kynthup ia u Secretary ka Tnad Pule Puthi bad State Project Director ka SEMAM, u Director of School Education and Literacy bad Deputy State Project Director ka SEMAM, lem bad u Officer on Special Duty ka Samagra Shiksha.
Ki Nongiashimbynta ki kynthup ia ki District School Education Officer, Sub-Divisional School Education Officer, District bad Block Mission Coordinator, MIS Coordinator lem bad ka kynhun ki riew shemphang ba wan ai jingkren na ka Indus Action.
Haba ai jingkren, u Secretary ka Tnad Pule Puthi ula batai ia jingbthah jong ka kyndon 12(1)(c) jong ka RTE Act, kaba bthah ba ki skul shimet ki bym ioh jingiarap (bym dei ki rit paid) ki dei ban buh ia ka bhah kumba 25% ka seat ha ka klas I ia ki khynnah kiba wan na ki longiing kiba duna ka jingioh (EWS) bad ki Disadvantage Group (DG) ba kynthup ia ki Schedule Caste, Schedule Tribe, ki Khynnah ba shah ktah ha ka HIV, ki khunswet bad kiwei kiwei.
U la ban jur ba ka jinghikai kaba kynthup lang ka kyntiew ïa ka jinglong ïaryngkat kyrdan ha ka imlang sahlang, ka ïarap ban pynduh ïa ka jingshah peitkhmat bad tei ïa ka jingïatylli hapdeng ki khynnah na ki jaitbynriew bapher bapher.
U Director DSEL ula kdew ba ka jingpyntreikam ïa kane ka kyndon kan ai jingmyntoi ïa kiba bun ki longïing kiba duk ha kylleng ka jylla, bad pynthikna ba ki khun jong ki kin ïoh ïa ka jingpule kaba bha khlem da ïakynduh jingeh ha ka liang ka pisa tyngka.
U la khot ia baroh ki nongshim bynta—kynthup ia ki heh jong ka pule puthi, ki skul shimet, ki kmie ki kpa, bad ki paidbah—ban iatreilang ha ka ban pynthikna ia ka jingpyntreikam kaba jop ia ka kyndon 12(1)(c) jong ka RTE Act.
Ban pynsuk ia kane, ka jylla ka la plie ia ka RTE Meghalaya Portal, kaba la shna khnang ban pynlong pdeng ia ka rukom aplai bad ka jingpynrung kyrteng. Ka portal ka thmu ban pynbeit ia ka jingpdiang skul ia ki khynnah, ka jingpynrung kyrteng ha ki skul, bad ka jingpeit bniah jong ki tnad, haba pynthikna ruh ia ka jingtreikam kaba shai, ka jingtreikam kaba paka ha ka rukom pyniaid kam, bad ka jingpynbeit ia ki jingeh.
