Rakhe ka Jylla ia ka Sngi Kyrpang ki Nonghikai
Shillong, Nailur 05: Ka Sorkar Jylla hynne ka sngi nyngkong, kala pynkup burom ia ki 46 ngut ki Nonghikai da kaba ai khusnam State Award bad District Award kum ka jingithuh ia ka synniang ban kyntiew ia ka pule dangle ha ka Jylla.
Haduh 13 ngut ki Nonghikai kila ioh pdiang ia ka State Award bad 33 ngut kila ioh ia ka District Award. Nalor kane, ka sorkar kala sam ruh ia ka Special Award bad kiwei kiwei ki Khusnam.
Ia kine ki khusnam la sam ha ka jingrakhe ia ka sngi kyrpang ki Nonghikai ne Teachers Day ba 61, kaba long hynne ka sngi ha U Soso Tham Auditorium, Shillong.
Haba kren kum u kongsan, u Myntri ka Tnad Pule Puthi Bah Lahkmen Rymbui ula iaroh ia ka jingtrei shitom jong baroh ki Nonghikai khamtam ha ki snem ba ka Jylla ka shah lynshop ha ka khlam Covid-19, kiba la hap pyndonkam ia ki kor ki bor ka juk ban ai jinghikai sha ki Khynnah skul ka Jylla.
“Kam long kaba suk ia ki Nonghikai ban pynkylla ia ka rukom hikai na kaba ai jinghikai hapoh ki kamra klas sha ka jingai jinghikai online. Hynrei kila lah pat ban iakhun ia kitei ki jingtynjuh ha kaban ai ka jingshakri kaba bha tam ia ki Khynnah skul” ula ong.
U Bah Rymbui ula pynpaw ba ki nonghikai kila mad shibun ki jingeh kum ka jingbym ioh ryntih iaka tulop, ka jingbym ioh thikna iaka tulop bad ula ong ba ka sorkar kan shimkhia bad kan pynthikna ban shimkhia ia ki mat jingdawa jong ki nonghikai.
Ula ban jur iaki nonghikai ba ka long kaba kongsan ban ai jinghikai ha ka lynti kaba thymmai na ka bynta ban kyntiew iaki khynnah skul bad iaka pule puthi ha ka jylla.
Ia kine ki khusnam la sam da u Bah Lahkmen Rymbui ha ryngkat ka jingdonlang u Commissioner & Secretary ka Tnad Pule Puthi u BDR Tiwari, u Secretary ka Tnad Pule Puthi u Ambrose Marak, ki nonghikai bad kiwei kiwei.
Ia kane ka jingrakhe la pyniphuh iphieng da ki jingrwai bad jongshad na ki khynnah skul jong ki skul bapher bapher.
Ki kyrteng jong ki Nonghikai kiba la ioh pdiang ia ka State Award ki long:
State Awards
1. Smti Lasubon Shullai, Assistant Teacher, Laittyra UP School, Laittyra
2. Shri. Dibiland Iawphniaw, Headmaster, Malaisohmat UP School, Phlangwanbroi
3. Smti. Sidamon Kurbah, Headmistress, Wahrit Govt. UP School
4. Smti. Bioles Lyngdoh, Assistant Teacher, Mawthawpdah (Def) UP School Mawthawpdah
5. Shri. Dipak Kumar Saha, Assistant Teacher, Govt. Boys’ Higher Secondary School, Jowai
6. Shri. Arun Kumar, Principal, Seinjait Tuber HS School, Tuber Kmaishnong
7. Shri. T P Tmung, Principal Umroi Presbyterian HS School, Umroi
8. Shri. Jeremias Kharbani, Headmaster, Mangsang Secondary School, East Garo Hills
9. Shri. Dominic Marak, Assistant Teacher, Don Bosco HS School, Mendal
10. Shri. Jairaj Chetry, Headmaster, Gorkha Deficit UP School, Tura
11. Smti. Hezillina T Sangma, Head Teacher, Akkonggre Govt. LP School
12. Smti. Dewbarlinda B Sangma, Headmistress, Ampati Deficit UP School
13. Shri. Lindstorm K Marak, Headmaster, Rugapara Deficit Secondary School
