Shillong, Jymmang 30: U Mission Director ka Drug Reduction, Elimination and Action Mission (DREAM) Bah Francis Kharshiing u la ong ba ka thong jong ka Sorkar ka long ban buh ia ki jaka sumar (Rehabilitation Centre) ia ki ba kyrni drok ha man la ki district hadien ba la dep ban ia soi ia ka Memorandum of Understanding (MoU) bad ka Kerala Psychiatric Society (KPS) ban weng iaka jingduna ki nongsumar (Psychiatrists) hapoh ka Jylla.
Haba kren sha ki lad pathai khubor u Bah Francis u la ong, “Ngi don ka thong ban plie ia ki jaka sumar (Rehabilitation Centre) ha man la ki distrik, lada ym lah ban buh bun tylli ruh hynrei dei ban buh beit kawei ka jaka sumar ha man ki District. Ngi kwah ruh ban don ki Detox Cenre ha man ki District. Iaka mynta ngi don tang 2 tylli ki Detox Centre ka Sorkar. Ki don ki Detox Centre jong ki riew shimet ba donkam ban siew pisa. Namar ba ka Sorkar ka khuslai iaki ba wan naki longïing ba duna haka ioh ka kot , namar kata ka Sorkar ka kwah eh ban don ïa ka jaka sumar (Rehabilitation Centre) bad ki Detox Centre ha man la ki District”.
Haba iadei bad ka jingduna ki nongsumar (Psychiatrists), u Mission Director u la ong ba shen ka Sorkar kan sa iasoi ia ka MoU bad ka KPC na Kerala.
“Ngi don ka jingduna ki Psychiatrist ha kane ka por, Nga la iakren bad ka KPC bad haduh ka taiew ban wan, ngin sa don ka video conferencing bad ki ha ryngkat bad u Principal Secretary bad u Sommissioner & Secretary bad shen ngin sa ia soi ia ka MoU” u la ong.
“Ka Kerala ka pynmih kumba 72 ngut ki nongsumar Psychiatrists ha ka shisnem bad kiba bun ki dei kiba dang wad kam. Kumta, ki thrang bha ban wan trei bad ngi. Katkum ka jingïakren jong ngi, ngin pynshlur ïa ki ban ïasnohkti lang bad ngi. Tang shu pyntreikam ïa ka MoU, ngin sa sdang ïa ki Detox Centre ha man la ki District” u la bynrap.
U Mission Director u la pyntip ruh ba shen bha ka Sorkar kan buh ruh ia ka jaka jaka sumar (Rehabilitation Centre) ha Tura, West Garo Hills bad u la ong ruh ba ka thain Garo Hills ruh ka shah ktah ha ka jingma jong u drok.
U la ïathuh ruh ba kawei ka jaka sumar (Rehabilitation Centre) yn buh ha Nongstoin, West Khasi Hills bad u la ïathuh ruh ba kila dep ban pynlong iaka jingjurip ïa ka Building ba la thmu ban buh ïa ka jaka sumar ha Tura bad Nongstoin.
 Bah Francis Kharshiing u la ong ba ka thong jong ka Sorkar ka long ban buh ia ki jaka sumar (Rehabilitation Centre) ia ki ba kyrni drok ha man la ki district hadien ba la dep ban ia soi ia ka Memorandum of Understanding (MoU) bad ka Kerala Psychiatric Society (KPS) ban weng iaka jingduna ki nongsumar (Psychiatrists) hapoh ka Jylla.){kind=link}