Kohima, Nailur 05 : Ka jingdawa ban ioh noh la ka jong ka jylla, kata ka ‘Frontier Nagaland’ ha ka thain mihngi ka Nagaland kala sdang ban ioh ia ka jingkyrshan kaba pura.
Hadien ba ka seng Eastern Nagaland Peoples’ Organisation (ENPO) kala bteng ia ki jingdawa ki jong ka na ka bynta la ka jong ka jylla, haduh kumba 20 ngut ki MLA ha Nagaland la ong ba kila kut jingmut ban ym iashim bynta ha kino kino ki ilekshon tad haduh ban da pynurlong ia ka jingdawa.
Ka thain mihngi ka Nagaland ka kynthup ia ki hynriew tylli ki district, kata ka Mon, Tuensang, Kiphire, Longleng, Noklak bad ka Shamator.
Kine ki hynriew tylli ki district ka Nagaland ki dei kiba la shong shnong da ki hynniew tylli ki jaidbynriew, kata ki Chang, Khiamniungan, Konyak, Phom, Sangtam, Tikhir bad ki Yimkhiung.
Ka ENPO ha ka jingialang kaba dang shen bad ki riewsain hima, ki nongiatrei jong ki trai shnong lem bad kiwei pat ki kynhun seng na ka thain mihngi ka Nagaland, kila shim ia ka rai ban ym iashim bynta ha kino kino ki ilekshon tad haduh ban da pynurlong ia kane ka jingdawa jong ki ban pynioh la ka jong ka jylla ka “Frontier Nagaland.”
“Kine ki 20 ngut ki MLA ka thain kin ym lah ban iaid lait ia ka mon jong u paidbah. Kane ka jingiakhih dawa jylla ka dei ka jingiakhih jong u paidbah, bad ngi ia don ryngkat lang bad ki,” ong u CL John, secretary ka Eastern Nagaland Legislators’ Union bad u MLA ka NPF lyngba ka lad pathai khubor.
Ka ENPO kala phah ruh ia ki nongmihkhmat bad ka memorandum sha ka sorkar pdeng ha ki ba bun ki khep naduh ba kila sdang ia kane ka jingiakhih ha ka snem 2010, ong u nongthaw ain ka NPF.
Ia ka ilekshon sha ka iingdorbar assembly ka Nagaland kaba don 60 ngut ki dkhot lah ban pynlong ha u bnai Rymphang-Lber 2023.
