Shillong Jymmang 26: U MP Rajya Sabha ka jylla Dr WR Kharlukhi hynne ka sngi Nyngkong ula pynpaw ia ka jingskhem jingmut ba ki shipai Border Security Force (BSF) kila biang eh ban tehlakam ia kano kano ka jingjia ha ki thain khappud bad ka ri Bangladesh ban pynthikna ia ka jingshngain bad jingiada ia ki paidbah ka Jylla bad ia ka ri baroh kawei.
“Ki Border Security Force ki don ban shimkhia ia kano kano ka jingjia bad ngam iohi ban don kano kano kaba ngi dei ban khuslai” ong u Dr Kharlukhi haba iakren bad ki nongthoh khubor.
Ula bynrap, “Ia nga hi, nga tharai ba kan bha shibun ban kylli na ki briew kiba sah ha ki thain khappud namar kin tip kham bha hynrei na kaei kaba nga iohi na jngai ka long ba ki don hangtei ban leh ia la ka kamram bad nga kyrmen ba kila trei ia ka kam ka jongki”.
U Dr Kharlukhi ula pynpaw ba ka ri Bangladesh ka don hapdeng jong ka kynrum kynram bad ula ong, “To ngin ia peit shwa nyngkong. Katkum ka jingsaphriang, nga lah iohi ba kila ong ba u Chief Adviser ula kwah ban iehnoh ia ka kam, kan ym lah ban jia. Nga tharai ba kin ialeh ban pynneh ia ka jinglong jingman. Kumta ngin sa ia peit, ngi ngin ia ap bad ban peit ia kaban sa jia”.
