Guwahati, Jymmang 26: U Myntri Rangbah ka jylla Assam u Himanta Biswa Sarma ha ka sngi u Blei u la ong ba kito kiba ju byrngem ia ka India halor ka lynti iaid kaba long kum ka ryndang syier (chicken Neck) ba pyniasoh ia ka thain Shatei La Mihngi ka Ri, ki dei ban sngewthuh ba ka ri ba marjan ka don ar tylli ki lynti iaid kum u ryndang syiar kiba kham don jingma bha.
Haba kynthoh ha X, u Sarma u la ong, “Ka Bangladesh ka don ar tylli ki jaka iaid ba long kum ki ryndang syiar bad kine baroh ar tylli ki long kiba kham don jingma bad kaba nyngkong kadei kaba don haduh 80 kilo meter ha North Bangladesh na Dakshin Dinajpur ban iasoh sha South West Garo Hills, bad lada don kino kino ki jingpynthut hangne ka lah ban pynia khlad syndon ia ka Rangpur division na baroh kawei ka ri Bangladesh,”.
“Kaba ar kadei ka jaka ba 28 km ha Chittagong, na South Tripura tad haduh ban da poi shaduh Bay of Bengal. Kane ka lynti iaid ka kham rit ban ia ka jong ka India India’s chicken neck, kaba dei tang kane kaba lah ban pyniasoh hapdeng ka ioh ka kot jong ka Bangladesh bad ka nongbah sain pyrthei,” ong u Sarma.
U Myntri Rangbah ka Assam u la pynskhem ba u pynpaw ia ki “jingshisha jong ka jaka kiba don kiba lah ban klet”, “Kumba long ka Siliguri Corridor jong ka India, ka ri ba marjan jong ngi ka la shah pynrung ha ki ar tylli ki lynti rit jong ki,” u la ong shuh shuh.
Kane ka jingkren jong u Sarma ka la mih hadien katto katne taiew ba u nongai jingmut ba ha khlieh duh jong ka Bangladesh bad uba la ïoh ïa ka khusnam Nobel, u Muhammad Yunus, u la wanrah ïa ka thaiñ shatei lammihngi jong ka ri India, ha ka jingleit jngoh jong u dang shen sha China bad u la buh ïa kane ka ri kum “ka nongap pahara ba marwei jong ka duriaw” na ka bynta kane ka thaiñ.
Katei ka jingmaham, ka la mih halor ki khubor ba la kynnoh ba ka China, ka iarap ia ka Bangladesh, ha ka ban pynim biang ia ka ktem liengsuin, ha ka por jong ka thma bah ba ar, kaba don ha Lalmonirhat, kaba jngai tang 100 km na ka lynti iaid kjat jong ka ryndang syiar (Chicken’s Neck).
