Shillong, Jymmang 26: U MP ka Rajya Sabha u Dr WR Kharlukhi u la ong ba ka sorkar ba ialam da ka NPP kan dang iai bteng ban bat ia u lakam ka jingsynshar wat hadien u snem 2028.
U Dr Kharlukhi u la kyntait ruh ba ka don ka jingkhihwin hapoh ka NPP ba ialam iaka Sorkar Jylla.
“Em kam don jingkhihwin hapoh ka Party ba ialam iaka Sorkar. Kane ka sorkar kan neh haduh ban da kut ka samoi treikam bad katkum ka jinglong jingman jong ka sain pyrthei ngin dang bteng biang ban thaw ia ka sorkar ha u snem 2028” la ong u Dr Kharlukhi.
Halor ka jingkynnoh ba ki MLA ka NPP ha Khasi Hills ki lah ban phet seng sha ka Liang Pyrshah ka Voice of the People Party (VPP) hashuwa ka elekshon elekshon 2028, u president barim ka NPP u la ong, “Tang lada ka VPP ka pynkhein ia ki nongrim jong ki kumba ki la leh ha Jowai North MDC constituency te kata ka dei ka kam kaba pher. Ka nongrim jong ka VPP ka long ban nym ai ticket iaki MLA barim, shaei kin leit ki MLA. Kam don kum kata”.
“Ngin sa peit ynda la wan ka elekshon, lada kim pan tiket na ngi te ka long kaba shisha hynrei ha nga, ym don kum kita kiei kiei” u la bynrap.
Haba kylli halor ka lyer jong ka VPP hapoh ka Jylla, u Dr Kharlukhi u la ong “Em, ngam ïohi kumta. Ngi la jop ha ka elekshon JHADC. Hangne ruh ha ka elekshon MP ba la dep, ki la jop 25 seat na ki 29 seat bad mynta ki la hiar sha ka 17 seat. Ngi don sa 3 snem shwa ka elekshon. Ngam iohi baka VPP ka buh jingma ia ngi”.
Haba ïadei bad ka Jaiñtia Hills, u la ong, “Haki ar tylli ki elekshon ba la dep, ngi dei ka Party kaba heh tam ha ka thaiñ. Ngi don ïa ka jingïoh vote kaba bun tam. Ngi nang kiew bad ngi dang pynneh ïa ka jingkiew jong ngi. Mynta ka kynti ha ka elekshon JHADC, ngi la ïoh 13 ngut bad ha ka ilekshon ba la dep ngi la ïoh 12 ngut.”
“Ha Khasi Hills mynta ka kynti ngi la ioh 4 ngut ki MDC. Ka jingiapher ka long namar ba ki constituency MDC ki jan long kumjuh kum ki constituency MLA. Ha ka ilekshon MLA ba la dep ngi la ioh 4 ngut bad mynta ngi lah ban pynneh hi 4 ngut. Ha ka elekshon ban wan nga tharai ba ngin sa nang kiew” u la ong.
Halor ka jingpyrshang jong ka VPP ban rung shapoh Garo Hills, u nongialam ka NPP u la ong, “Nga tharai ba ki dei ban pyrshang. Haba phi dei ka Party, pyrshang ban long ka Party jong ka jylla baroh kawei ym tang jong kawei ka thain. Kumta, ki dei ban pyrshang”.
