Nongstoiñ, Nailur 4: Ki don haduh palat 300 tylli ki shnong ki bym pat ïoh satia ïa ka um bam um dih kaba biang ha West Khasi Hills baroh kawei hynrei kila don jingkyrmen mynta ba ka Sorkar kan phaikhmat noh lyngba ka Jal Jeevan Mission (JJM).
Ka jingbym ioh ia ka umbam umdih kaba biang naka Tnad Public Health Engineering (PHE), kala pynlong ia ki paidbah jong kine ki Shnong ban iakynduh ia shibun ki jingeh khamtam ha ka por tlang namar ba bun ki pung tongum ki rit bad don ruh kiba rngad lut.
U Bah S Nongbri, uwei na ki Nongialam Shnong ka West Khasi Hills ula ong “Ngi tip ba ka sorkar pdeng ka la buh ïa ka thong ba baroh ki shnong la ha sor ne kyndong, ki dei ban ïoh ïa ka um kaba biang haman la kawei pa kawei ka thliew ïing. Ka Sorkar Pdeng kala wanrah ia ka skhim JJM ban weng noh ia kane ka jingeh ki paidbah”.
Une u Rangbah ula ong ba kat kum kane ka skhim, ka Sorkar Pdeng kala bthah ia ka Sorkar Jylla ba ka dei ban phah ia ki jingai jingmut bad ia ka jingdon jong ki Shnong, ki Longiing bad ka jingbun briew ha ka Jylla khnang ba kan ioh mang pisa naka skhim.
“Ngim tip ka Sorkar kala leh aiu halor kane ka bynta. Namar haduh mynta, ngi da ki spah ki shnong ha West Khasi Hills ngim pat ioh satia ia ka umbam umdih kaba biang” ula ong.
