Shillong Jymmang 26: Ka skulbah North-Eastern Hill University (NEHU), kawei na ki skulbah ba pawnam ha ka thain shatei lam mihngi ka ri India, kala rakhe ia ka 52nd University Day hynne ka sngi Nyngkong da ka jingkmen bad ka jingkyrmen kaba thymmai na ka bynta ka lawei.
U MP ka Rajya Sabha u Dr. W. R. Kharlukhi bad u samla pule barim jong ka NEHU ula long kum u Kongsan ula pyllait paidbah ia ka jingrwai jong ka NEHU kaba la ai kyrteng “Rise Up and Build” kaba la thaw da u Dr. Uttam Sharma, ryngkat bad ki kyntien ba la thoh da u Prof. Shobhan N Lamare.
U Prof. Lamare ula batai bniah shaphang ka jingpynshlur kaba don ha lyndet jong ka jingrwai, da kaba pynksan ïa ka jingmut jong ka jingong jong ka University “Rise Up and Build” bad ka dak jong ka sngi kaba mih—kaba pyni ïa ka jingshai, ka jingshisha bad ka bor. Ula kdew kumno ka jingrwai ka shim na ka jingitynnad jong ka mariang bad ki khanatang jong ka ri, ki wah, bad ki wahduid, ha kaba kut ka thmu ban pynshlur ia ki samla ban shim ia ka jingkitkhlieh bad shakri ia ka jaitbynriew.
Ka jingïalang ka la sakhi ïa ka jingïashim bynta kaba sngewtynnad na ki dkhot jong ki nonghikai, ki non-teaching staff, bad ki samla pule, kaba pynpaw ïa ka mynsiem ïatylli kaba pynlong ïa ka University ban ïaid shakhmat.
U nongialam jong ki samla pule u Toniho S. Kharsati uba dei u General Secretary ka NEHUSU, ula ai ka jingithuh ia ki jingjop bad ia ki jingeh kiba ka NEHU ka ia kynduh. Haba pyrkhat ïa ka jinghiar jong ka skulbah dang shen ha ka kyrdan NIRF—naduh napdeng ki 20 sha ka kynhun ba 101-150 ha u snem 2024—u la khot ïa ka jingpeit bniah ïalade bad ka jingkut jingmut lang.
Ula ïaroh ïa ka jingïalam jong ka Prof. S. M. Sungoh, Vice-Chancellor (In-Charge), da kaba kdew ïa ki jingkylla kiba lah ban ïohi ha ki jingtei bad ki kam pule puthi hapoh ka jingïalam jong ka.
U Bah Wandondor R. Synrem, President ka NEHUNSA, u la khot ïa ka jingïatylli ha ka jingtreikam ban wanrah biang ïa ka burom barim jong ka NEHU, da kaba ai burom ïa ka Union jong ki samla pule kiba la sdang ïa ka jingkylla kaba bha.
Haba pynkynmaw ïa kijuh ki jingsngew, u Prof. Lakhon Kma, President ka NEHUTA, ula pynpaw ba ka University ka la mad ïa ki jingeh kiba la jan dap shisnem hynrei mynta ka dei ka por ban kiew shaphrang bad ula ai jingiaroh ia u Prof. N. Saha bad ia Prof. Sungoh kiba la rung ha ki kam nongialam ha ki por ba eh bad pyniaid ia ka skulbah da ka jingshlur bad jingkut jingmut.
Ka Prof. S. M. Sungoh, ka Vice-Chancellor In-Charge, kala kam ïa ka bynta kaba eh kaba ka NEHU ka la ïaid lyngba ha kine ki bnai ba la dep hynrei ka la pynpaw ïa ka jingaiti lut jong ki nonghikai bad ki nongtrei kiba la trei palat ïa ka jingkhot jong ka kamram ban pynneh ïa ka jinglong ba janai ha ka jingpule.
“Ngi don ha ka lynti ban ioh biang ia ka burom jong ka NEHU,” kala ong bad kala kular ban pyniaid ia ka University sha ka jingnang jingstad, ka jingpynwandur thymmai, bad ka jingroi kaba kynthup lang ia baroh.
U Dr. W. R. Kharlukhi kum u kongsan ula ai khublei ïa u Prof. Lamare bad ka kynhun jong u halor ka jingpyllait paidbah ïa ka jingrwai bad ula pynleit jingmut halor ka jingïaid lynti jong ka NEHU lyngba ki jingeh.
“Ki jingeh ki long ki jingkyrkhu,” ula kynthoh, da kaba pynskhem ba ka jingkhraw bunsien ka mih na ki jingtynjuh bad ula pynkynmaw ia la ki jong ki sngi samla pule ha NEHU bad u la pynksan kumno ka University ka pynwan dur ym tang ia ki kam hynrei ia ka jinglong jong ki samla pule jong ka. Da kaba ai nuksa kum u Prof. Sungoh bad ma u hi, u la ong da ka jingsngew sarong, “Ngi baroh ngi dei ki jingmih na ka NEHU.”
, kawei na ki skulbah ba pawnam ha ka thain shatei lam mihngi ka ri India, kala rakhe ia ka 52nd University Day hynne ka sngi Nyngkong da ka jingkmen bad ka jingkyrmen kaba thymmai na ka bynta ka lawei.){kind=link}