Shillong, Jymmang 22: Ka All India Save Education Committee (AISEC) Meghalaya chapter hynne ka sngi ka la pyllait paidbah ia ka draft jong ka People’s Education Policy (PEP) 2025 ha Shillong ban pyrshah iaka National Education Policy (NEP) 2020.
Haba kren sha ki lad pathai khubor u Interim president jong ka AISEC Meghalaya Chapter, Samborlang Dkhar u la ong ba PEP 2025 ka long kaba pyrshah ia ka NEP 2020 kaba la pyntreikam jubor daka Sorkar Pdeng ha ka por ba ka ri ka don hapdeng ka jingkhang dam namar ka jingpang khlam COVID-19.
U Bah Samborlang u la ong ba ka jingwanrah ka AISEC iaka PEP kadei ban bujli iaka NEP 2020 namar ka Sorkar Pdeng kala pyntreikam iaka NEP khlem da iasyllok ne pan jingmut naki stad haka liang pule dangle, ki scholars, ki nonghikai, ki samla pule bad baroh ki paidbah ka Ri India.
Kumba long ha baroh ki nongbah jong ki Jylla ka Ri, ka AISEC Meghalaya Chapter mynta ka sngi ruh kala pyllait paidbah ïa ka draft PEP 2025 kum ka jingtyrwa ban bujli ïa ka NEP 2020” ong u Bah Samborlang.
U Secretary ka AISEC Meghalaya chapter Bah Batskhem Marboh u la ïathuh ba la thaw ia ka Meghalaya chapter ha u snem 2024 hadien ka jingiaphylliew jingmut lang bad ki nongialam na Delhi bad na Assam ban pynjur iaka jingiakhih ha baroh kawei ka Ri ban pyrshah ia ka NEP 2020.
U Bah Batskhem u la kynnoh ba ka NEP ka pynshlur ia ka jingpynlong kam khaii ia ka jingpule ha ka ri kaba la pynlong ia ka AISEC ban pynlong ia ka jingiakren bad jingiamir jingmut bad ki briew kiba don kajuh ka jingmut kiba don jingthmu ban pynim bad kyntiew ia ka pule puthi.
“Ka AISEC ka pyllait ïa ka draft PEP na ka bynta ka jingïakren bad jingïamir jingmut ha ka ri baroh kawei, ym kum ka NEP 2020 ïa kaba la pyntreikam jubor daka Sorkar Pdeng khlem kano kano ka jingïakren ne iamir jingmut hapdeng ki riew shemphang ha ka pule puthi, ki riewstad, ki nonghikai, ki samla pule bad ki paidbah jong ka Ri” la ong u Bah Batskhem.
U Bah Batskhem u la ong ba ka AISEC ka pdiang sngewbha ia baroh ban iadon bynta lang ha AISEC naka bynta ban pynim ia ka pule puthi ha ka ri na ka jingshah shim kabu ha kino kino ne ki bor ki bym don jingsngewtynnad ne ki bym don jingthmu ban kyntiew ia ka pule puthi .
“Hadien ba la ïoh ïa baroh ki jingai jingmut, ka AISEC kan rah ïa kane ka draft hapoh ka National People’s Parliament ka ban long ha u bnai Kyllalyngkot 2026 ha Bengaluru ban bujli ïa ka NEP bad ban dawa na ka sorkar pdeng bad ki Sorkar Jylla ban pyntreikam iaka PEP 2025” u la bynrap.
******
 Meghalaya chapter hynne ka sngi ka la pyllait paidbah ia ka draft jong ka People’s Education Policy (PEP) 2025 ha Shillong ban pyrshah iaka National Education Policy (NEP) 2020.){kind=link}