Shillong, Jymmang 22 : Pyrkhat hi phi ia ka skul kaba ka tnum kala jan hap, ka umslap ka shlei ha ki kamra klas, bad ki kynroh ba sngem ki pyni ne em ia ka jingshah iehnohbein, hynrei, wat hapdeng kine ki jinglong jingman ki bym shngain bad ba bun ki jingtynjuh, ki jingai jinghikai ki dang iaid beit shaid shaid namar ha ki briew jong ka thain, tang ka skul ka dei ka jingkyrmen jong ki.
Kane ka dei ka jingshisha kaba isangsot bha jong ka skul Nongspung A Garo Lower Primary School, ka skul kaba la don la 49 snem ha ka Shnong Nongspung A, kaba hap hapoh ka Jirang Block jong ka Ri-Bhoi District. Ia kane ka skulk a seng ha u snem 1976 bad ka dang iai bteng ban ai ka jingshakri ia ki khynnah kiba wan na ki longiing kiba dun aka jingioh, ki bym lah satia ban kot bor ban phah sha ki skul shimet lane sha ki skul Sorkar kiba don marjan.
Hadien ba ioh jingtip ia ka jinglong jingman jong kane ka skul, u Myntri Rangbah ka Jylla Conrad K Sangma ula leit ban iuhkjat ha kane ka shnong hynne ka sngi Palei bad leit peit ruh dala ki khmat ia ka jinglong jingman jong kane ka skul.
Haba pynpaw ia ka jingsngewkhia ia ka jingjot rathai jong ka iingskul, u Myntri Rangbah ula kular ban tei thymmai noh ia ka Iingskul ka ban iaid da ki bynta bynta.
“Kane ka Iingskul ka dei kaba la sniew bad jot rathai bha…..ha ryngkat bad u MLA ka thain, ngi la rai ban iatreilang bad ai ha ki ia ka jingtei ba thymmai. Nga kular ia kata” ula ong hadien ba wan iuhkjat ha kane ka skul ha ka sien leit iuhkjat ba nyngkong eh hapoh ka shnong bad ka thain.
Ula pyntip ruh baka song pisa na ka bynta ka jingtei ia ka Iingskul yn sa mang na ka Chief Minister Special Development Fund (CMSDF), ka jingkyrshan na u MLA bad ka Sarva Shiksha Abhiyan (SSA) ban pynthikna ia ka jingshna da ki bynta bynta ia kane ka iingskul. “Nalor ka skhim CMSDF jong nga, kat kaba ioh jingkyrshan na u MLA bad na ka skhim SSA, ngin sa pyrshang ban tei thymmai ia ka Iingskul da ki bynta bynta, ka ban iaid kham kloi kat kaba lah” ula ong.
Nalor kane, kum ka dak ka jingroi jingpar kaba pura, u Conrad ula noh synniang ruh ia ka acoustic guitar bad ki bol phutbol sha ki khynnah skul. “Nga la kular ban sa ai ia ki tiar put tiar tem bad ki tiar ialehkai. Katto katne nga la wanrah lang bad nga la aiti ia ki ha ki khynnah” ula ong.
U Myntri Rangbah ula shim ruh ia ka por ban ai jinghikai ia uwei u khynnah skul kumno ban tem ia ka guitar, haba batai ba kumno un bat ia ka guitar, ban buh ia ki kti ha ki string bad ban tem.
