Shillong, Jymmang 20 : Ka Khasi Hills Autonomous District Council (KHADC) ha ka sngi Ba-ar, kala thalain tyngeh ia ki bor pyniaid District ka Ri-Bhoi namar ka jingkhang dam ia ka khyrdop lum khajna ka Council ha shnong Umdihar khlem da ai ia kano kano ka notice/jingpyntip.
Haba niew ia kane ka kam kum ka “jingibein” ia ki bor ka Council, u Nongaiktien ka Executive Committee ka EC ba ialam da ka VPP Bah Powell Sohkhlet ula ong “Ngi don khyrdop lum khajna ha kylleng ki District kiba hap hapoh u pud u sam jong ka Council bad kine kim ju mad satia ia kano kano ka jingeh ha ki snem bala leit noh. Tang mynta namar ba ka VPP kala shimti ia ka EC ha KHADC, kane ka jingjia kala mih”.
“Kane ka pyni ruh ia ka jingshisha ba ki bor district kila niew ia ka KHADC kum ki Sengbhalang lane ki runar, kiba lum pisa beain” ula ong haba bynrap “Ngi la lyngngoh namar ha ka por ba ngi pyntreikam ia ka khyrdop(hadien ba pynthymmai), la shu khang noh dam dam. Nga suba jur ba ka don kaei re kaei ha lyndet ka jingleh jong ki bor District” ula ong.
Ha kajuh ka por, u Bah Powell ula ong “Ngim sngewtynnad satia ia ka jingleh u Magistrate ba don ha ka kam. Ka dei ka bym lah ban pdiang namar kum ka EC bala jied da u paidbah, ngim shym la pyniaid ia ka Sengbhalang ne ki runar hangne. Sngewsih ban png ba la I kumba ki bor District ki niew ia ngi kum ki nongpynkhein ain. Kumta, nga pynrem jur ia kane ka jingleh ki bor District”.
Kat kum ka jingong jong u, ka khajna bala lum da ka KHADC ki long kat kum ki kyndon ka Sixth Schedule jong ka Riti Synshar ka Ri India.
Ka khyrdop lum khajna ka KHADC ha Umdihar kala shah khang dam ha ka 16 tarik Jymmang, shisngi hadien ba dep plie ia ka.
U Executive Member ba khmih ia ka Trade bah Winston Tony Lyngdoh ula ong ba kane ka khyrdop bala aiwai sha u Pyndailang Diengdoh ka dei kawei na ki 11 tylli ki khyrdop bala pynieng da ka KHADC ha kylleng ki District mynta la bun bun snem.
“Ka khyrdop kam dei kaba be-ain. Ngi la ai ia ka work order kaba biang hadien ba u nongshim wai ula ioh ia ka NoC na ka Dorbar Shnong, ia kaba ki copy la phah sha ka Ophis u Deputy Commissioner ka Ri-Bhoi bad sha u Superintendent of Police, ki bym shym la pyrshah hynrei kila phah pynban ia ki bor pahara ban iarap pahara ha ka 15 tarik Jymmang ha ka por ba sdang treikam ka khyrdop” ula ong.
“Tad haduh mynta, nga dang ap ia ka jingthoh na ki bor district ka Ri-Bhoi hashuwa ba ngi shim ia kano kano ka rai halor kane ka kam. Lada ki bor district ki pyrkhat ba ka khyrdop ka long kaba beain, thoh sha ngi namar ngi don hangne ym ban pynkhein ia ka ain” bynrap u Bah Winston.
U EM ula pyntip ba na ki 11 tylli ki khyrdop, tang 7-8 tylli ki dei kiba la treikam. “Lai tylli ki khyrdop la iakhang hadien ka jingujor na ki paidbah. Ngi la phah ia ki nongtrei jong ngi ban leit jurip ia kiwei ki khyrdop bad ngin sa rai la ki dang long ne em ban buh” ula ong haba bynrap ba ka Council ka long kaba kloi ban iatreilang bad ka Sorkar.
Nalor kane,u Bah Winston ula pynpaw ba um lah satia ban pynshai la ka KHADC kala thoh ne em sha ka Ministry of Home Affairs (MHA) ban pan jingbit ha kaban buh khyrdop bad bynrap “Hynrei ngi la buh ia baroh ki kyndon kat kum ka ain. Ki khyrdop lum khajna jong ka KHADC ki dei kiba la don la bun bun snem”.
Haba bynrap ia kane, u bah Powell ula ong ba ka KHADC kala shu pynthymmai ia ki work order ban aiwai ia kine ki khyrdop.
 ha ka sngi Ba-ar, kala thalain tyngeh ia ki bor pyniaid District ka Ri-Bhoi namar ka jingkhang dam ia ka khyrdop lum khajna ka Council ha shnong Umdihar khlem da ai ia kano kano ka notice/jingpyntip.){kind=link}