Shillong, Jymmang 19 : Ki paidbhur kiba don ym duna ia ka 300 ngut, kila thang ia 15 tylli ki trok ka kompani Star Cement ha Lumshnong, East Jaintia Hills, hadien ka jingiap jong uwei u samla uba shah iuh ha ka trok jong ka kompani hynnin ka sngi U Blei.
Kat kum ka jingiathuh u Additional Superintendent of Police ka East Jaintia Hills, la ong ba hynnin ka janmiet kala don ka jingiatakhuh kali hapdeng ka Trok jong ka Star Cement bad kawei ka Bolero Pick-up ha surok NH-06 ha shnong Wahiajer hynrei une u nongniah trok ula phet krad na kane ka jaka, kaba pynlong ia ka Bolero Pickup bad kiwei ki kali ban iakthong haduh da poi ha phyllaw ka kompani Star Cement ha Lumshnong.
U iathuh ba ynda poi ha kane ka jaka, uwei na kiba shong ha Bolero Pickup ula leit kiew beit beit ha kane ka trok bad shoh ia u nongniah ka trok. Ha ka jingpyrshang ban phet krad, kane ka trok ka kompani kala ioh iuh ia u nongniah jong ka Bolero Pickup, uba la khlad hashen.
Une u Heh Pulit u pyntip ba hadien kane ka jingjia, kumba 300 ngut ki briew kiba rah la ki wait bad kiwei kiwei ki tiar pyn mynsaw kila leit iatur sha phyllaw ka Star Cement bad kila thom naphang ia ki jaka ieng ki nongpahara, ki CCTV bad shoh ruh ia ki nongap pahara.
Hadien kane, kila thang ia ki trok kiba don kumba 14-15 tylli, kiba pynieng ha jaka pynieng kali kaba don ha phyllaw jong ka Kompani bad mar kumta hi, ka kali pynlip ding kala wan ban iakhun ia ka ding hynrei ki paidbhur kila thombor pynban sa ia kane ka kali bad ia ki Pulit pynlip ding ba don hapoh haba pyrshang ruh ban pynjulor ia kane ka kali pynlip ding.
La iathuh ba ki Pulit kila pyrshang ban tehlakam ia kine ki paidbhur hynrei la ong ba kine ki briew kila thombor pynban ia ki Pulit ruh bad dei da ka jingwan poi kloi jong ki bor pahara bala phah da ka Tnad, la lah ban tehlakam ia une u paidbah uba la nang saphred bad jah suki suki.
Na ka liang ka Ophis u Superintendent of Police kala pynkhlain ia ka jingpahara ha Star Cement bad ki Heh Ophisar kila peit ngor bha ban tehlakam ia kino kino ki jingjia kiba lah ban nang pynheh ia kaei kaba la jia.
Ki Pulit kila register case halor kane ka jingjia bad ka jingtohkit mynta kala iaid shakhmat. Ia ka metiap jong u nongniah ka bolero pickup la pynkit noh sha Civil Hospital, Khliehriat ban pyndep ia ka post mortem.
