Shillong, Jymmang17: U Myntri ka tnad Sports & Youth Affairs Bah Shakliar Warjri ha ka sngi Thohdieng ula iathuh ba ka Meghalaya kala long kaba la pynkhreh ban pynlong ia ka National Games ha u 2027.
Haba iakren bad ki nongthoh khubor u Bah Warjri ula ong “Ki jingtei kiba donkam na ka bynta ban pynlong ia ka National Games kila don lypa ha ka jylla. Ngi lah don lut ia kiei kiei hynrei lada phi peit ha ki 2 snem kiba la leit, la dep ban tei ia kiba bun ki jingtei.”
“Khamtam eh ia ka National Games, kam donkam eiei ban khuslai ha kaba iadei bad ki jingtei” ula pynthikna.
Nalor kane u Myntri ula pyntip ba ka sorkar pdeng kala rai ban shah ia ki 7 tylli kiwei pat ki jylla jong ka thain shatei lam mihngi ban pynlong ia kawei ka jingialehkai jong ka National Games kaban pynlong da ka Meghalaya ha u 2027.
“Kila don katto katne tylli ki jingialehkai kaba ngin ai ia kiwei pat ki jylla jong ka thain shatei lam mihngi bad kam dei satia halor ka jingkam ba ngim pat biang ia ki jingtei” ula ong.
Haba kylli la yn lah ban pyndep ia ki jingtei hashwa ban sdang ka National Games.
“Ki don katto katne ki projek, ka jingtei ka dang iaid shakhmat bad ki don kiba ym pat sdang ia ka jingtei hynrei la buh ia ka por ban pyndep ia baroh ki projek hashwa ban long ka National Games,” ula ong bad ka bynrap, “Ki projek kiba dang sah ban tei pyndep ki kynthup ia ka
Indoor Stadium ha JN Stadium. Ki Stadium kiba kongsan kidei kiba lah dep.”
Ula pyntip ba ia ka Football Stadium ha Makhanu kadei kaba ym pat sdang ban tei.
Halor ka jingpynkhreh, u myntri ula ong, “Ngi lah thung bun tylli ki committee, kiban peit ia ki jaka ban pynlong ia ki jingialehkai bapher bapher. Hooid ka lah ban don ka lad ba ngi lah ban pynlong ha SAI ruh hynrei kan shong pat katkum ka jingdonkam. Kumta lada donkam, ngi lah ban pyndonkam ia ki jingtei jong ka SAI.”
