Shillong, Jymmang 16 : Ka Sorkar Jylla kala wanrah ia ki project kum ka kam thung coffee bad cocoa kum ka lad ban ai da kiwei pat ki lad kamai jakpoh ia ki briew kum ka sienjam ban lah iada ia ki khlaw catchment area bad ki tyllong umbam umdih hapoh ka Jylla.
Haba pyntip ia kane ha ka sngi Thohdieng, u Myntri ba khmih ia ka Tnad Social & Water Conservation Marcuise N Marak ula ong ba dang shen ula leit jurip ia ka jaka thung arabeca coffee ha ka shnong Dura kallakgre ha North Tura bad ka jaka thung Cocoa ha shnong Aguragri.
Ia kane ka project la pyntreikam da ka Tnad Soil & Water Conservation.
“Ha ka jingjurip, nga la iohi ba u coffee ula mih bha. Nga la kren sha ki nongshongshnong hangtei bad kren ruh halor ka jingkongsan ka kam thung coffee” ong u Marak haba bynrap ba ka jingthung coffee ka dei ruh kaba la leh ha East Khasi Hills, Ri-Bhoi bad Ri-lum Jaintia.
“Ngi don bha ia ka lad ban kyntiew ia ka jingthung ia u Arabica coffee, uba dei u jingthung ba bha bad ngi la thung ia une u jingthung hangne nalor kiwei kiwei ki jait coffee, kiba mih ha ki jaka them-kiba la thung ha Ri-lum Garo” ula bynrap.
Haba kylli, u Myntri ula ong “Balei ka Tnad Soil & Water Conservation ka shim ia kane ka kam ka long namar lashai lashisngi kine ki lad kamai ki lah ban iada ia ki shyngiar bad ki tyllong jong ki wah bad ki tyllong umbam umdih”.
“Ka shnong ha North Tura ka dei ka Catchment Area jong ka Wah Ganol, kaba ai ia ka Tura Water Supply Scheme. Bun kiwei ki Water Supply Scheme ki shaniah na ka wah Ganol. Kumta, ka long kaba kongsan na kane ka bynta” ula ban jur.
Nalor kane, u Myntri ula pyntip ba ka Sorkar kala pyntrei ruh ia kiba bun ki project ban pynkhie im bad ai da kiwei pat ki lad kamai ia ki briew na ki Tnad bapher bapher kynthup ka rep ka riang, ka kam repsoh rep pai, ka tnad khlaw, MBDA bad C&RD.
Ha ka jingleit iuhkjat ha ka jaka thung Cocoa ha Aguragri,u Marak ula ong “Nga la leit ban peit ia ka project hangtei. U Cocoa u dei u mar uba jur bha ka jingdawa na ka bynta ban shna chocolate”.
Ula pynbna ruh ba ka kompani Cadbury kala ai dak ba kin sa dei ki nongthied kiba hehduh ia u mar cocao ba mih na Jylla Meghalaya.
