Shillong Jymmang 15: U Myntri Rangbah ka jylla u Conrad K. Sangma hynne ka sngi Palei, ula pynbna ia ki sienjam ban leh ia ki kam wad bniah ne Research kiba kongsan halor ka thymmei jong ki jaidbynriew riewlum jong ka jylla.
Kane ka jingpynbna kala mih haba ai jingkren ha ka National Seminar kaba ar sngi jong ka Synod College, Shillong, kaba la pynlong halor ka mat “His Footprints in Time: Trailblazers of Meghalaya in the Making of Modern India,”, kum shi bynta jong ka jingrakhe ia ka Diamond Jubilee.
Ia kane ka Research Project, yn leh da ka kynhun kaba kyrpang hapoh jong ka tnad Arts & Culture, kan donbynta ha kaban ngam jylliew ha ki jingwad bniah hapoh ka ri India bad shabar ri.
“Ia ka prokram kaba bniah yn sa pynthikna ha kine ki 2-3 bnai kiban wan” ong u Myntri Rangbah bad ka bynrap, ba kane ka sienjam kadei da ka jingthmu ban pynneh pynsah bad pynkhlain ia ka jinglong tynrai ha ka kolshor jong ki jaidbynriew ka jylla Meghalaya.
Haba ai jingkren ha ka jingialang u Conrad Sangma ula iaroh ia ka Centre for Historical Research, Synod College (CHRSC), bad ong ba ka jingpynlong ia ka seminar ba ka dei por kaba biang ban iatai halor ka jingpynneh, ban lum thup iaki jingtip bad ban rakhe ia ki jingiathuh khana shaphang ki khlawait kiba ym pat ju tip bad ki khraw pyrkhat kiba leh ia kiei kiei kiba nyngkong eh” haba banjur ia ka jingkongsan ban iathuh ia kiei kiei kiba dei jong ki trai shnong na ka bynta ban saindur ha kaba iadei bad ka jinglong tynrai ka ri India.
Ha kane ka jingialang plie, la iadonlang u Dr. Wanwei Roy Kharlukhi u Rajya Sabha MP kum u kongsan symbud, Dr. Gayreen Lyngdoh Principal jongka Synod College, katba u Dr. David Arnold Kharchandy u Secretary jongka CHRSC, ula ai jingbatai halor ka jingthmu jong kane ka seminar.
La pynlong ruh ia ka jingpynkup burom ia ki riewshimet bad ia ki longiing longsem halor ka jingnoh synniang ka jongki sha ka pule puthi, ka kam sain pyrthei, ka thoh ka tar, ka jingwanrah ia ka jingkylla ha ka imlang sahlang, ki jingtip tynrai bad ka Theology.
Palat 35 tylli ki jingthoh ne Papers la pynpaw ha kane ka seminar, kaba batai shaphang ki jingnoh synniang jong u Dr. Phervision Nongtdu (educationist), Rev. Shai Rabooh Manar (spiritual leader), B.M. Pugh (tribal reformer), Prof. A.K. Nongkynrih (academic) bad Hally War (indigenous engineer behind the Umkar Root Bridge).
Kiwei kiwei ki jingbatai ki kynthup ia ki kam kiba la synniang da u Rev. J.J.M. Nichols-Roy (legal reformer), Kynpham Sing Nongkynrih (literary icon), Dr. Donkupar Roy bad Prof. G.G. Swell (political leaders) bad Brian D. Kharpran Daly (cave explorer).
Kane ka seminar kala ai burom ruh ia u shipai uba la khlad ha ka thma Kargil u Captain Clifford Nongrum, u nongrwai ia ki jingrwai tynrai u Bah Skendrowell Syiemlieh bad ia u mishoneri u Rev. Dr. Amos C. Moore.
Kane ka jingialang kala pyni ruh ia ka jingskhem jingmut ha kaba iadei bad ka historical scholarship bad ka jingpynneh pynsah ia ka kolshor, kaba buh ia u mawnongrim ban ngam jylliew bha ha ki kam wad bniah ha ki kam kiba ka jylla Meghalaya kala donbynta ha kaban saindur ia ka India kaba mynta.
