Barpeta, Nailur 03 : Ka jingiashoh iadat hapdeng ki nongshong shnong kala khie hapoh kawei ka Anganwadi Centre ha Barpeta district ka Assam hynnin ka sngi Thohdieng hadien ba ki kmie ki kpa jong uwei u khynnah uba khlem leit skul kila poi sha ka jingiania bad ka nongtrei Anganwadi kaba la kyntait ban ai ia ka pylleng kaba dei ka bhah na ka bynta jong u.
U Hafizur Khan bad ka Chan Bhanu Khatun kila shah kynnoh donkti ha kaba jrongkti ia ka Sahatan Ahmed hapoh Anganwadi Centre number 2 hapoh ka shnong Kaljar kaba ha Barpeta, ong ki khubor.
Kaei kaba la pynlong ia kane ka jingkynad kalong da shisha kaba sngew thamula namar kine ki shijur, u Khan bad ka Khatun kila leit iakynduh ia ka Ahmed ban pan ia katei ka pylleng kaba thmu na ka bynta u khun rit jong ki watla um shym la poi sha skul, hynrei namar ka jingkyntait ban ai kane kala lam sha ka jingia-jrongkti bad ka jingialeh markylliang.
Tang hadien khyndiat por kiba bun ki briew kila wan pyniasoh ha kane ka jingiashoh iadat hapoh kane ka Anganwadi Centre bad kaba la kylla long kum ka madan thma, ha kaba ki nongiashim bynta kila pynpaw iala ki jong ki sap iakhun, kum ha ka boxing, wrestling bad kiwei pat ki rukom.
Hadien na ka liang katei ka lanot kala iathuh lyngba ki lad pathai khubor ba kala kyntait ban ai namar kim don ki kyndon ki ban shah ban ai bam na ka bynta kito ki khynnah ki bym shym la don hapoh ka Centre.Nalor kata kala kynnoh ruh ba ba khun rit jong ka ruh kala shah ktah kti ha kitei ki kmie ki kpa kiba don hapdeng ka jingbitar.
Ka Ahmed kala ong shuh shuh; “Ym don ki kyndon kiba shah ban ai bam” bad ba ki nongtrei ki hap ban phah ia ki dur sha ki bor ba halor man la ka sngi.
Ka video kaba pyni ia kane ka jingjia kala saphriang sted lyngba ki social media, ha kaba bun na ki nong kynthoh kila pynpaw ba kumno tang namar kawei ka pylleng kan lam shaduh kane kane ka jingjia jong ka jingiashoh iadat.
Kiba kum kine ki jingjia ki pynkynmaw ia ki briew ba wat hapdeng ka jingpyrshang borbah jong ka sorkar, hynrei ka jingthngan bad ka jingkyrduh bam ka dang iai long kawei na ki jingeh hapoh India.
