Shillong, Jymmang 13 : Ka kynhun ialehkai ka Meghalaya kala rung sha ka phainal jong ka 3rd NECDC Senior Men’s Interstate Friendship Tournament 2025 hadien ka jingjop ia ka semifinal pyrshah ia ka Arunachal Pradesh da 7 wicket ha Nagaland hynne ka sngi Ba-ar.
Ka Meghalaya kala jop ia ka jingkynting pisa bad kala phah tied nyngkong ia ka Arunachal Pradesh, kaba la lah ban kamai run tang 101 ha ki 33.1 over. Ka Meghalaya kala lah ban beh ia kane ka thong tang hapoh ka 19.3 over.
Ia kane ka lympung ialehkai la pyniaid da ka Nagaland Cricket Association hapoh ka lama jong ka North East Cricket Development Council, ka ban iarap pynkhreh ia ki Jylla ban leit sha ka jingialehkai hapoh iing jong ka BCCI 2025-26.
Ha ki artylli ki samoi ialehkai bala dep, ka Meghalaya kalarung sha ka phainal bad ka jingkynnoh ka leit sha ka suin bneng ha baroh arsien.
Mynta ka sngi, ki lai ngut ki nongkawang bol Manish Sharma, Ram Gurung bad Aryan Borah kila lam lynti ia ka Meghalaya sha ka jingjop. U Manish ula shim 4 wiket bad ai 3 run ha ki 5.1 over katba u Ram ula shim 3/21 ha ka 7 over bad u Aryan ula shim 3/28 ha ka 10 over.
U Arpit Bhatewara ula ialam ha ka jingbeh thong bad ula kamai 49 runs na ki 39 bol ia ka Meghalaya ba kynthup ia 10 tylli ki saw run. Ma u bad u Arien Bonchang Sangma (22 na ka 30) kila buh 56 run kum ki nongtied ba nyngkong katba u Noshanta Chakraborty (16 khlem out) bad Lerry G Sangma (1 run) kila pyndep ia ka jingbehthong.
Ka Meghalaya kan iakhun ia ka phainal pyrshah ia ka Champion jong u snem bala dep-ka Nagaland ha ka jingiakhun ka ban long la sngi palei.
Ka Nagaland kala pynliem ia ka Manipur da 4 wiket ha ka jingiakhun semiphainal hynne ka sngi.
