Nongpoh, Jymmang 13 : Ka surok Jorabat kaba don ha khappud Meghalaya-Assam, kala shah tap biang ha ka jingshlei um hynne ka sngi Ba-ar hadien ka jingther u slap uba la neh tang hapdeng shiteng kynta.
Kane ka jingshlei um ha Jorabat ka dei kaba ju jia man ba jur ka jinghap slap bad ka daw ka dei hi namar ka jingbym biang ki nala, ka jingsahkut ki jaboh ha nala kaba khang lynti ia ka um ba kan iaid.
Kane ka jingshlei um kala jia hynne ka por nohphai sngi bad ka um kala kiew bha haduh ba bun ki kali khamtam ki kali rit, kim lah shuh ban iaid. Kane ka jingshlei um kala wanrah ruh ia ka jingdheng kali kaba jur ha ka thain bad ktah jur ia ki nongleit nongwan
Ki nongshong dukan ha ka thain kynthup kiba don sha ka liang ka Meghalaya bad Assam, ruh kila shah ktah bha na kane ka jingshlei um.
