Iakynduh u VP ka India ia ki kynhun SHG ka Jylla | Iaroh ia ka Sorkar ba pynkupbor ia ki Kynthei

Shillong, Jymmang 13 : Ka kynhun ba 30 ngut ki dkhot Self Help Group (SHG) ka Jylla, hynne ka sngi Ba-ar, kila iakynduh ia u Vice President ka Ri India Jagdeep Dhankhar ha New Delhi, uba la iaroh ia ka Sorkar Jylla kaba la shimkhia ban pynkupbor ia ki Kynthei ha ka ioh ka kot.

Ia kane ka kynhun ki dkhot SHG la ialam hi da u Myntri Rangbah ka Jylla Conrad K Sangma ha ka jingiadonlang ki Ophisar ka Meghalaya State Rural Livelihood Society (MSRLS).

Kane ka jingleit iakynduh ia u VP ka long shibynta na ki sienjam bala shim da ka Sorkar ban pynkupbor ia ki kynhun Kynthei ha ki Shnong ki thaw bad ban plie lynti ba kin tip ia kiei kiba long ba man ha ka Ri.

Ha ka jingiakren iakhana, u Vice President ula iaroh ia ka jingpyrshang jong ka Sorkar ban pynkupbor ia ki kynhun Kynthei bad ula kubur ia ka jingkiew kaba la pynkylla dur haph ka jingialamjong u Myntri Rangbah Conrad K Sangma.

U Vice President ula pynpaw ruh ba ka jingpynleit jingmut jong ka Sorkar ha ka jingpyn kupbor ia ki kynthei, ka jingnang pynjanai ha ka jingsam ia ki jingbam teimet, bad ki jingmih na ki lad ai jingsumar ia ka koit ka khiah ki Longkmie ka long ka nuksa kaba khraw bha bad pynpaw ia ka jingiapbiej ia ka jingkiew ka roi ka par ki kynthei ha Meghalaya.

Kine ki 30 ngut ki dkhot SHG na kylleng ka Meghalaya kin sa leit jngoh ruh ia ka Prime Minister Museum. Kane ka kynhun ka kynthup ruh ia ki nongialam SHG kiba ioh jingkyrshan hapoh ka National Rural Livelihood Mission (NRLM) bad ki prokram ka Sorkar Jylla.

Ha kine ki shiphew snem bala leit, ka Meghalaya kala sakhi ia ka jingkiew ka jingiashimbynta ki kynthei lyngba ki SHG bad ki Dorbar Shnong. Tang na ka 5000 tylli ki SHG ha u snem 2015, ka Jylla mynta kala don haduh 52,000 tylli kiSHG kiba treikam. Ia mynta, palat 5.2 lak ki kynthei kiba shah kdup hapoh ka SHG Mission. Kala don ruh ka jingkiew ha ka jingdon ki Village Employment Council (VEC) ba ialam da ki Kynthei naduh u snem 2022-24.

Ki kyrteng jong kine ki dkhotSHG kiba la synran ia u Myntri Rangbah ki kynthup ia ka : Agnesh Momin – East Garo Hills, Zerina R Sangma – East Garo Hills, Gonitha R Marak – East Garo Hills, Tangchi Sangma – North Garo Hills, Sonabal Sangma – North Garo Hills, Tinamuni R Marak – North Garo Hills, Cheryan Topsy R Sangma – North Garo Hills, Balse R Marak – North Garo Hills, Bethsidha D. Sangma – North Garo Hills, Amritha Marak – South Garo Hills, Novina Ch. Sangma – South Garo Hills, Lahun Mary Blah – West Khasi Hills, Letizia Lyngdoh Mawphlang – East Khasi Hills, Joycy Mary Wankhar – East Khasi Hills, Pdianghun L. Nonglait – Eastern West Khasi Hills, Behappy L Nonglait – Eastern West Khasi Hills, Lucia Wahlang – Eastern West Khasi Hills, Carolyne Ryntathiang – Ri Bhoi, Regina Dkhar – West Jaintia Hills, Mardorlyne Pariong – West Khasi Hills, Markordor Nongrem – West Khasi Hills, Arjulish Ch. Sangma – South Garo Hills, Aitilin Marbaniang – Ri Bhoi, Josephine Lyngdoh – Ri Bhoi, Mary Ann Diengdoh – Ri Bhoi, Santi Shylla – East Jaintia Hills, Merry June Ymbon – East Jaintia Hills, Baiasngewlem Lamare – West Jaintia Hills, Waiting Syrti – West Jaintia Hills, bad Pynshnalad Suting – East Khasi Hills.

Kane jingleit sha Delhi kam dei tang ka jingialam kai byrngia, hynrei ka dei ka jingithuh ïa ka jinglah trei kam bad ka jingangnud jong ki kynthei na Meghalaya. Ka pyni ruh ia ka jingangnud jong u Myntri Rangbah ban pynthikna ba ki kynthei na ki jaka ba jngai tam jong ka jylla kin ioh ia ka lad ban iadon bynta, ban ioh jinghikai, bad ban long nongialam.