Shillong, Nailur 02: U Symbud Myntri Rangbah ka Jylla ba khmih ia ka tnad Bording Bah Prestone Tynsong hynne ka sngi thohdieng ula ong ba ka Meghalaya Energy Corporation Limited (MeECL) kam don pisa satia ban thungkam pura noh ia ki Nongtrei Casual ne wat ban thung ia palat 1000 ngut ki briew ha ki kam kiba lait.
Kane ka jingkren u Symbud Myntri Rangbah kala mih tang da ki sngi hadien ka jingiarah lama iong jong ki Nongtrei Casual kiba don hapoh ka lama MeECL Progressive Workers Union (MePWU), kiba dawa ia ka Sorkar Jylla ban thungkam pura noh ia ki bad ban pyllait noh ia ki arrear ba dang sahteng.
Haba kylli, u Bah Prestone ula ong ha ki nongthoh khubor ba u sngewthuh bha ia ka jingeh jong ki namar ki don ki nongtrei Casual kiba la trei ym duna ia ka 15 haduh 18 snem hynrei ka pla tyngka jong ka MeECL ka la stang bha.
Hynrei ula ong ruh ba ka MeECL ia mynta hi kam don pisa wat tang ban thungkam ia palat 1000 ngut ki briew ha ki kam kiba lait ba kynthup ia ka kam Junior Engineer, Assistant Engineer, Executive Engineer bad kiwei kiwei.
“Kane ka dei ka jingeh namar ngim don lynti pat da kumwei ban leh eiei ha kaban thungkam mardor ha kine ki kam ba lait hynrei ngi dang thaw ia ki lad ki lynti ban thung ia ki briew kat kum ki kam kiba la donkam palat” ong u Bah Prestone.
Haba kyntu ia ki Nongtrei Casual ba kin iai shah shuwa bad ka MeECL, ula ong “Haba iadei bad ka jingkyntu jong ki Nongtrei Casual, nga sngewthuh ia ka jingeh, ngi tip ia ka jingiai kiew dor ki mar ki mata manla u snem, nga sngewthuh eh hynrei nga kyrpad ia ki ba kin ailad shuwa ia ngi ba ngin pynkhuid lut shwa ia baroh ka ram jong ka MeECL”.
