Shillong, Jylliew 14: Ka Bharatiya Janata Party (BJP)-Meghalaya Pradesh ka dang ap mynta ia ka rai jong ki Nongialam na Delhi la ban iakhlad lok noh na ka Sorkar Meghalaya Democratic Party (NPP) ba ialam da ka National Peoples Party (NPP).
U President ka BJP Bah Ernest Mawrie u pyntip ba ka BJP kan sa shim ia ka rai ha ka jingialang ban wan jong ka NationalExecutive Committee ka ban long shen ha Hyderabad.
“Ia kane ka kam ngin sa iakren biang ha ka jingialang jong ka National Executive Committee ha Hyderabad. Ha kane ka jingialang ngin sa shim ia ka rai namar kin sa pan ia ka kaiphod na Meghalaya bad nga hi dalade ngan sa aiti ia ka kaiphod” ong u Bah Ernest haba iakren bad ki lad pathai khubor hynne ka janmiet.
Une u Nongialam ka BJP ula iathuh ba katto katne ki Nongialam jong ka BJP na ki District bapher bapher ka Jylla kila pynpaw ia ka jingdonkam ba ka BJP kan mih noh na ka sorkar MDA ha ka jingialang jong ka State Executive Committee ba long myn ha ka 25 tarik Jymmang ha ka jingiadon lang u National General Secretary (Organisation) ka BJP u AjayJamal.
“Kum u President ka Jylla ha ryngkat bad u General Secretary (Organisation),ngi la kren shai bha ba ia kane ka kam hap ban shim rai daki Nongialal na Delhi” ong u Bah Ernest haba bynrap “Ngi la dep phah ktien sha Delhi bad ka bor ka shong ha ki ban ai ka jingbthah la ngin dang iai neh bad kane ka Sorkar ne ban weng noh ialade. Ta ka daw ngi dang ap mynta ia ka rai ki Nongialam na Delhi”.
Haba kylli ia ka jingpynsngew jong ki arngut ki MLA ka BJP, u President ula ong “Baroh arngut ki MLA kata u Bah Sanbor Shullai bad Bah A.L.Hek kin hap ban ap ia ka rai na Delhi. Kat kaba mih ka rai na Delhi, ngin hap ban bud ia kane ka rai jong ka Party bad ka rai jong u President ba hakhlieh duh”.
