Shillong, Jymmang 10 : Ka Hynniewtrep Youth Council (HYC) kala pynbna ba kan sa pynlong noh ia ki jingiakhih bapher bapheer ban pyrshah ia ka jingbym lah jong ka Sorkar ban pynurlong ia ki mat ba sahteng ba kynthup ia ka jingpynkynriah ia ki 342 tylli ki Longiing na Them Metor bad ka jingpyntreikam ia ka Meghalaya Residents Safety and Security Amendment Bill (MRSSAB) 2020 ban tehlakam ia ka jingwan rung be-ain ki bar jylla sha Meghalaya.
Haba iakren bad ki nongthoh khubor, u President ka HYC Roykupar Synrem ula ong “Ngi la rai ban pynlong ia bun ki jingiakhih pyrshah ia ka Sorkar bad ki buit pynslem. Ngin ym shu sngap jar. Ha kine ki sngi ban wan, ngin sa pynlong ia ki jingiakhih, ki ban sa ai ia ki jingtip ba bniah”.
Une u Nongialam ka HYC ula ong ba ka kam ban pynkynriah ia ki Longiing na Them Metor, Them Iew Mawlong kala shu sahteng mynta la 6-7 snem.
“Ka Sorkar kala kular ia ki paidbah ka Jylla khamtam na Ri-lum Khasi Jaintia bad ia kine ki longiing yn sa pynkynriah noh sha kiwei ki jaka. Ka Sorkar kala dep ban ai ha ki ia ka jaka bad air uh ia ka blueprint ba tyrwa ban shna ia ki iing flat hynrei mynta shu kynsan kynsan la mih da kiwei pat ki ishu” ula ong.
“Mynta, ka Sorkar kala wad da kawei pat ka jaka da kaba kyrpad ia ka Defence Ministry ban ai ia ka jaka ban pynkynriah ia kine ki longiing. Ngi shem ba kane kam dei kaei kaei ruh hynrei tang ka buit ban thied ia ka por. Ngim long satia kiba kloi ban pdiang ia kane ka buit pynslem jong ka Sorkar bad ngi pynrem ia kane ka sienjam bad ngi dawa ba ka Sorkar kan shim ia ki sienjam kiba donkam ban pynkynriah noh ia kine ki briew na kane ka thain” ong u Bah Roykupar.
Halor ka jingpynslem ban pyntreikam ia ka MRSSAB, 2020 bad ka ILP, une u President ka HYC ula ong “Ngi la iohi ba u Myntri Rangbah ka Jylla naduh u snem 2023 ula kular bad pyntip sha ngi ba ia ka MRSSAS la pynphai sha ka Sorkar bad ka Sorkar Jylla kan sa khot ia ka jingiaang bad baroh ki kynhun bapher bapher. Hynrei naduh u 2023 haduh mynta, kam pat don satia kano kano ka jingia lang ba khot da ka Sorkar halor kine ki artylli ki mat”.
Ha kajuh ka por, ka HYC kala buh jingkylli ia ka jingbym lah jong ka Anti Narcotics Task Force (ANTF) ban leh eiei pyrshah ia ki case NDPS hapoh ka Jylla.
U Bah Roykupar ula ong “Naduh ka 2 tari Jymmang 2024, ngi la sdang ia ka jingiakhun pyrshah ia u droks. Hooid ha ka por ba dang thnem ka jingiakhih bad ka rai jong ngi ban tur sha Secretariat ha u bnai Naiwieng, ka Sorkar Jylla lyngba ka shithi, kala kular ba kan shim ia ki sienjam ban pyntreikam ia ki jingdawa ka HYC ba kynthup ia kaban buh ia ka ANTF ka ban khmih beit thik tang ia ki case NDPS”.
“Watla ka Sorkar kala pynkha ia ka kynhun ANTF, sngewsih ba haduh mynta ym pat don kawei ruh ka case bala register hapoh ka ANTF Police Station. Ka jingkylli ka long balei ka ANTF kam shym la shim ia ki sienjam ba donkam pyrshah ia ki case NDPS” ula bynrap.
 kala pynbna ba kan sa pynlong noh ia ki jingiakhih bapher bapheer ban pyrshah ia ka jingbym lah jong ka Sorkar ban pynurlong ia ki mat ba sahteng ba kynthup ia ka jingpynkynriah ia ki 342 tylli ki Longiing na Them Metor bad ka jingpyntreikam ia ka Meghalaya Residents Safety and Security Amendment Bill (MRSSAB) 2020 ban tehlakam ia ka jingwan rung be-ain ki bar jylla sha Meghalaya.){kind=link}