Shillong, May 9: Ka Meghalaya kala shim ia ka sienjam kaba khraw ha ka ban iada ia ka mariang da kaba pyndonkam ia ka buit pynrben khlaw Miyawaki-ka lynti kaba sted bad ba treikam bha ban pynrben ia ki khlaw da ki dieng ha ki shnong ki thaw.
Kane ka buit ka dei kaba la pynwandur ha Japan da u Botanist Akira Miyawaki bad mynta la pyndonkam ha kylleng ka Jylla kum shibynta jong ka project ban pynrben biang ia ki khlaw ki btap bala lamkhmat da ka Tnad Soil & Water Conservation, ka Sorkar Meghalaya.
U Myntri Rangbah ka Jylla Conrad K Sangma ula shim iaka bynta ba hakhmat eh ban iada bad pynneh pynsah ia ka mariang. Ula pynpaw ia ki jingsngewkhia kiba jur halor ka jingpom pathar ia ki dieng ha kylleng ka jaka bad ula shim ia ka lynti ban pynjyrngam biang ia ki khlaw ki btap lyngba ki prokram bapher bapher.
Ban kyrshan ia kane ka jingpyrshang, ka Sorkar kala wanrah ia shibun ki prokram ba kynthup ia ka Green Meghalaya bad kala iatreilang ruh bad ki kynhun bapher bapher ban pyntreikam ia ki prokram pyntben khlaw bad ban iada ia ki khlaw. Ka Sorkar Jylla kala ai ruh ia ka song pisa lyngba ka Payment for Ecosystem Services (PES) ban iada bad pynneh pynsah ia ki khlaw.
Ha ka sngi Palei, u Myntri Rangbah ula leit jngoh ia ka khlaw Miyawaki ha Mawsharoh, Ummir, East Khasi Hills, kaba la pyndonkam ia ka buit Miyawaki ban pynrben ia ka khlaw ha ka jaka ba 1.5 hectare. Ia mynta, kum kane ka project la pynteikam ruh ha ka jaka ba haduh haduh 25,000 hectare ha kylleng ka Jylla Meghalaya.
Ki Heh Ophisar ka Tnad Soil & Water Conservation kila batai ba kumno ka buit Miyawaki kala iarap ban pynrben biang ia ka sawdong sawkyn. Kane ka buit ka kynthup ia ka jingthung ia ki dieng ba mih hi ha ka thain, kiba la thung da ki kyrdan kyrdan, kaba lam sha ka jingheh sted ki dieng bad pynrben ia ka khlaw.
Ia kane ka project la pyntreikam da ka jingkyrshan ba radbah jong ki nongshongshnong, kiba la iadonbynta shitrben ban thung ia ki dieng bad ban sumar ia ka khlaw. Ka Miyawaki forest plantation ba nyngkong eh ha Meghalaya kala sdang lai snem mynshuwa ha Ri-lum Garo kum ka project ba shu pyrshang.
“Ia kane ka project yn sa pyntreikam ha kylleng ka Jylla kum kaweie na ki sienjam ban pynrben biang ia ki khlaw ki btap” ong u Myntri Rangbah.
