Shillong, Jymmang 08 : Ka Liang Pyrshah Indian National Congress ha ka sngi Palei, kala pynbna ia ka rai ba kan nym iadon bynta satia ha ka All Party Committee bala thung da ka Sorkar Jylla ka ban shong bishar ia ki kam ba iadei bad ka jingtyrwa wanrah ia ka lynti rel hapoh ka Jylla.
Kat kum ka jingong ka INC, ka rai jong ka Sorkar ban thaw ia ka Committee ka dei tang ka kamkai ban pyni ba kila pynia donbynta lang ia baroh hynrei ka jingshisha hi ka long ba ki kwah ban tynrong ia ki jingkynnoh ha baroh haba iadei bad ki kamm kaba kim lah ban shim rai nalade.
“ Ka Congress khlem pep kan nym iadon bynta ha kane ka Committee namar ngim ngeit ba haba phi sahkut ha ka jaka ktieh bad phim lah ban shim rai ia kano kano bad phi tan lang ia baroh bad kynnoh lang ia baroh. Kam long satia kaba dei” ong u Secretary ka Meghalaya Pradesh Congress Committee (MPCC) Manuel Badwar haba iakren bad ki nongthoh khubor.
“Ka jingioh jong ka Congress ka long kaba shai. Ka Sorkar kam shym la thaw ia kano kano ka All Party Committee halor kino kino ki kam kiba kongsan ia ka Jylla. Ki shim rai hi tang dalade. Balei? Namar ba ki don ia ka jingbun paid. Kumta, la ia rai da ki paidbah ba bun balang ba ka Sorkar MDA kan shim rai hi dalade” ula ong.
“Kila ioh ia ka rai jog u paidbah ba kin pyniaid ia ka Sorkar. Ki dei ban pyniaid hala ka jong bad ngin sa peit la ka dei kaba dei lane kaba bakla hynrei ban thaw ia ka All Party Committee, phi mut kumta, ka dei tang ka kam kai” ula bynrap.
