Shillong, Jymmang 08 : Ka Meghalaya kala nang iaid jan sha u mawmer ban pynkylla bad pynitynnad ia ka thain Polo, kaba dei shi bynta jong ka Beutification project ka Shillong, da ka jingpyndep noh ia ka Polo Mall bad ka Riverfront Development Project.
U Myntri Rangbah ka Jylla Conrad K Sangma ha ka sngi Palei, ula hiar hurip ia kine ki project bad pynbna ba ka jingtei ia ka Polo Mall kala dep. Kane ka project mynta kala iaid ha ka jingaiwai ia ki dukan bad kiwei kiwei ki jaka jong ka complex, ia kaba la khmih lynti ban pyndep hapoh ka 2-3 bnai.
Ka Polo Mall ka dei u mawbyrsiem jong ka Polo Beautification Project, kaba la tei ha ka jaka ba ieng ka Iew Polo barim. Ka jingthmu jong ka project, kaba la pyntrei hapoh ka Shillong City Project, ka long ban pynkylla ia ka Polo kum ka “Time Sqaure” da kaba tei thymmai ia ka.
“Ki jingtrei jong ka Polo Mall kila dep lut. Mynta kala iaid ka jingaiwai ia ki dukan hapoh ka mall bad ngi kyrmen ba hapoh kine ki khyndat bnai, katto katne na ki dukan kin sa plie noh. Ka don ruh ka jaka pynbyrngia (entertainment centre), ka don ka jaka ba die bam, ki don ki jaka kiba heh ban iathied iapet….Nga kmen ban iohi ba ki kam ha Polo Mall kila iaid sted bha. Ha kine ki khyndiat bnai ban wan, ngi dei ban iohi ia ka jingplie ki dukan bad kiwei kiwei” ong u Conrad hadien ka jing jurip.
Kane ka Mall ka dei kaba la pyntrei ha ka jinglut kaba kot T.85 klur, bad la pynheh ia ka jingtei ha ka jaka ba 1.5 lak sqft. Kane ka jingtei ba hynriew mala kan don haduh 90 tylli ki dukan bad ki jaka pynieng kali.
Riverfront Development Project
U Myntri Rangbah ula leit jurip ruh ia ka Riverfront Development Project ha Polo, kawei pat ka project ba kongsan ia ka Jylla haba phai sha ka jingpynitynnad ia ka Shillong bad ia ka jingwan jong ka National Games 2027 hapoh ka Nongbah.
“Ki don ar bynta jong kane ka project-kawei ka dei ka jingtei jingtei harud jong ka wad Umkhrah bad ruh ka jingpynkhuid ia ka wah” ula ong.
U Conrad ula ong ba ka bynta ba nyngkong jong ka project, ba kynthup ia ki kam tei jingtei, kila iaid sted bha bad la khmih lynti ban pyndep hashuwa ban kut une u snem ba mynta lane haba sdang u snem thymmai, hapoh u snem mang tyngka 2025-26.
Ka bynta kaba ark an iohi ia ka jingnang mih ki dukan rit, ki jaka bam, ki jaka pynieng kali, ki iingbasa ia ki nongialehkai. “
U Myntri Rangbah ula ban jur ruh ia ka jingiashimbynta lang jong ki Dorbar Shnong bad ki nongshongshnong ban seisoh ka project.
