Shillong, Jymmang 07 : Haduh 22 tylli ki college kila aplai ban pyniasoh noh bad ka Captain Williamson Sangma State University.
Ia kane la pyntip da u Myntri ka tnad Pule Puthi Rakkam A Sangma ha ka sngi Ba-ar haba pyntip “Ki kam kila iaid ban pyniasnoh ia kine ki 22 tylli ki college bad ka State University”.
Kat kum ka jingong jong u, ki samla pule kiba aplai ban rung klas ha kine ki college kin ym donkam shuh ban ialeh ia ka eksam Common University Entrance Test (CUET).
Hynrei ula ong pat ba palat 50 na ka 70 tam ki college ha Jylla ki dei kiba dang iasoh bad ka North Eastern Hill University (NEHU) bad ki samla pule ba aplai rung klas ha kine ki college kin hap ban iakhun ia ka eksam CUET.
Haba kylli, u Myntri ula ong ba ka CUER kam dei ka shuh ka jingeh mynta ym kum ha ki snem bala leit namar ba kam don ka centre thoh eksam hapoh ka Jylla.
“Nga sngewskhem ba ki samla pule jong ngi kila pynkhreh bha ban iakhun ia ka eksam CEUT” ula ong haba bynrap ba ka samoi sdang klas ba thymmai ia ki Undergraduate kan sa sdang naduh u bnai Naitung-Nailar.
Ula ong ba ki samla pule kim iakynduh jingeh satia ha ba iadei bad ka jingioh rung klas.
“Artaiew mynshuwa nga la shong jingialang halor kane kajuh ka kam ha Tura. U Principal ka Don Bosco Higher Secondary School ula pyntip ba kim shym la ioh khynnah satia ban wan pule. Ka jingduna ka long haduh 150 ngut ki samla pule ban pyndap ia ka jaka” ong u Myntri.
