Shillong, Nailur 02 : Ka Mawlai ka dang bteng ban lamkhmat ha ka miej khein point jong ka Shillong Premier League hadien ba ka la ioh ban pynliem haduh 3-0 kol ia ka Mawkhar Sports Club ha ka jingiakhun jong ka 2nd Leg kaba long hynne ka sngi ha madan 3rd Ground Polo.
Kane ka jingjop kala pynlong ruh ia ka Mawlai ba kan nang jan ban pyntikna ialade ban ioh khur ia ka nam lahduh mynta ka samoi namar haduh mynta kane ka kynhun ialehkai ka la ioh 29 point katba ka kynhun kaba wan baar-ka Langsning kala ioh 21 point.
Ha ka jingiakhun, ka Mawlai tang ha ka minit kaba 10 ka la ioh ban pynkhih jar lyngba u Dajied Wanshnong ha shwa ba u Remark Kharmalki un ioh ban thep ia ka kol kaba ar bad balai ha ka minit kaba 50 bad kaba 90+4.
Ha shwa ba kitei ki arliang mamla kin iakhun, ka Mawlai ka don da ki 26 point katba ka Mawkhar pat ka don da ki 6 point bad don ha trai jong ka miej khein point.
Ha ka jingiakhun ha ka first leg, ka Mawkhar ka la lah ban pyniakhaid da mar 0-0 kol ia ka Mawlai kaba long ha ka 20tarik u Naitung.
Ka jingiakhun lashai ka sngi pat kan long hapdeng ka Rangdajied United FC kaba don 18 point pyrshah ia ka Malki kaba don mynta 7 point. Ha ka first leg ka Malki ka la ioh ban pyniakhaid ia ka jingiakhun khlem da don satia kiba ïoh thep kol.
