Shillong, Jymmang 03: Ki pulit jong ka Ri-Bhoi kila kem ia ki 3 ngut ki nongdie droks bad ka ioh kurup ia u Heroin ha ka jingkhynra kaba la pynlong ha ka miet jong ka sngi Thohdieng ha Umsning.
Hadien ka jingioh ia ki jingtip kiba paka ba u nongkhaii droks uba la tip kyrteng kum u Wellborn Khongjoh uba ju khot sin da u Bull, ula mih na Nongpoh ban leit sha Shillong ryngkat bad arngut ban die ia une u jingdih pynbuaid. Ka kynhun ki pulit jong ka Ri-Bhoi District kila bat ia ka kali Maruti Baleno kaba don ia u Registration Number ML-05AB-9902 ha ka por kumba 9:45 mynmiet hajan ka Lad Nongthymmai kaba don ha ka surok National Highway-6.
Haba la khmih bniah bad talasi ia kane ka kali ryngkat bad ia ki 3 ngut kiba shong hapoh ka kali kiba kynthup ia u Wellborn Khongjoh na Kynjoin Umran, u Fedrick Kharkrang na Shangbangla bad u Pascal Kharkrang na Shangbangla, la ioh ban kurup 10.9 gram uba la suba jur udei u Heroin.
Kumta ki pulit kila kem noh mardor ia kine ki 3 ngut.
Ki pulit kila rejistar case halor kane ka jingjia bad ka jingtohkit mynta ka dang iaid shakhmat.
