Shillong, Jymmang 03: Arngut ki dkhot jong ka Hynniewtrep National Liberation Council (HNLC) kila shah kem halor ka jingdonkti ha ki kam dawa pisa.
Kine ki arngut kiba la shah kem la tip kum u Pyndapbok Makri bad u Lary Pynkmen Nongshli, la iathuh u Superintendent of Police ka Ri Bhoi District u V Rathore hynne ka sngi Saitjain.
Ula ong, ba ka jingkem kadei hadien ba kila ioh ia ki jingtip kiba paka ba ka kynhun kieng atiar kaba la shah khein beain, ki dang pyrshang ban lum pisa be-ain kaba dei ruh kaba heh, na ki nongkhaii bad ki heh sorkar jong ka district da kaba byrngem ruh iaki ba kin pynmynsaw bad shim ia ka jingim bad kumta ter ter. Mardor hi lah pynlong ia ka jngkhynra ne ka Counter Insurgency Operation hynin ka sngi hapoh Ri-Bhoi district.
Ha katei ka jingkhynra, uwei uba la suba jur ba udei u dkhot ka HNLC u Pyndapbok Makri ula shah kem na Lad Quinine katba u dang leit lum ia ka pisa kaba la dawa.
Ha ka jingtohkit bad jingkylli bniah, sa uwei uba la suba udei u dkhot ka HNLC u Lary Pynkmen Nongshli ula shah kem na Umtyra da ka kynhun ki pulit jong ka East Jaintia Hills. La rejistar ia ka case bad ka jingtohkit ka dang iaid shakhmat mynta.
Nalor kane, u SP ula pyntip ruh ba kila don ruh ki katto katne ki ehrang kiba don ha Bangladesh kiba ialeh pyrshah ia ka ri kiba pyniasoh bad ka HNLC kaba la shah khein beain ha ka sorkar India, kila dawa pisa lyngba ka WhatsApp sha ki nongkhaii Khasi bad ki ophisar sorkar bad pynbor ia ki ba kidei ban siew ia kaba kila dawa bad kila byrngem byrsit ia ki bad ia ki bahaiing bahasem ki jongki ban leh da kaba tyngeh.
Hadien katei, kila phah pat da ki briew ki jongki (Overground Worker) kiba don hapoh Meghalaya ban leit lum ia katei ka pisa kaba kila dawa.
“Kine ki samla kila ngat ha katei ka shrip namar ba ki iohi ba ka long ka kabu kaba suk ban ioh pisa kloi. Lada shah kem kine ki nongiarap kin mad ia ka jingeh ha lynter ka jingim ka jongki katba ki ehrang kiba don ha Bangladesh pat ki lehkmen lehsngewbha ha ka jingim ka jongki” la ong u SP.
