Pan ka Meghalaya ia ka song $300 million na ka World Bank ban pyntrei ia ka MLCIP

Shillong, Iaiong 28: Da ka jingthmu ban wanrah ia ka jingkylla ha ka jingpynkit ia ki mar ki mata (Transport) bad ki jaka buh ia ki, ka jylla Meghalaya kala tyrwa ia ka jingiarap song pisa ba $300 million na ka World Bank, ba kan pyntreikam ia ka Meghalaya Logistics and Connectivity Improvement Project (MLCIP).

Ka thong jong ka MLCIP ka long ban pynbiang ia ka rukom treikam kaba biang, kaba lah ban kyrda bad shngain ha kaban pyniasoh bad kiwei pat ki bynta bad ki jaka khaii ha Meghalaya, ka jylla kaba ka ioh ka kot kala sah shadien na ka jingdon ia ki jaka kiba eh bad long riat bad ka jingbym don ia ki jingtei kiba biang.

“Watla ka don kyrhai ia ki jingdon jingem ka mariang, hynrei ka Meghalaya kala mad ia ki jingeh, kum ka jingbym biang ki lynti bad ki jingtei ia ki jaka buh ia ki mar bad ki jingai jingshakri kiba la lam sha ka jingduna jong ki ïew ki hat na ka bynta ki mar rep kiba la pynmih ha ka thaiñ, ka jingpynlehnoh ei ia ki mar rep bad ka jingrem ha ka jinglut ban buh ia ki mar ” la ong ka World Bank. Kala bynrap ruh ba ki jingeh ha ka leit ka wan kala mih na ka daw kiba bun na ka jingduna jong ka pisa, ka jingbym lah ban pyndonkam, ka jingduna palat ka rukom treikam jong ki tnad bapher bapher, ka jinglong lum ki jaka bad ka jinglong jingman jong ka suiñbneng.

Kumba long mynta, kumba 250 Km ki lynti shna surok kidei kiba lah dep ban ithuh, kaba kynthup ia ki surok kiba kongsan kiba la lah ban jied. Na katei ka jingtyrwa ban ai jingkyrshan, ka World Bank kan ai $240 million.

Ka Bank kala niew ba ka Meghalaya ka thmu ban kyntiew bun ïa ka jingnoh synñiang lyngba ka kam rep kam riang sha ka ïoh ka kot lyngba ka jingdon ia ki lad ban don ia ki iew ki hat kiba biang, ki surok kiba lah ban kyrda ha baroh ki aiom bad ki bynta kiba iadei bad ka jaka buh ia ki mar ki mata.

Ka jingpyntreikam ia ki thong kiba kongsan jong ka projek kadei kaba la khmih lynti ba kan wanrah ia: (a) ka jingpynbha ia ka jingpyniasoh sha ki jaka pynroi kiba kongsan lyngba ki surok kiba la ithuh, (b) ban pynbha ia ki jingtei bapher bad ki lad ai jingshakri ha ki thain nongkyndong, ha sor bad ha ki district. (c) ka jingdon ia ki iew ki hat kan pynduna ia ka jinglut/por na ka bynta ki mar rep bad ki jingthung kiba la jied ban pynpoi sha ki iew, (d) ban pynkhlain ia ka jinglah jong ki tnad treikam ban long kiba treikam bha, ka jingpynkit kaba iadei bad ka mariang bad ki jaka buh bad (e) ki jingmyntoi kiban leit beit-beit sha ki million ngut ki nongpyndonkam lyngba ka jingpynbha bad jingtei ia ka lad pyniasoh ha ka leit ka wan.

Ka projek, kaba don ia ka jingthmu kaba iar ban kyntiew ia ka leit ka wan, ka jingpynbiang ia ki jaka buh bad ki jingtei kiba iahap katkum ka juk kaba mynta, kadei kaba la khmih lynti ba ka Meghalaya kan jam sha ka kyrdan ban long pdeng ha ka ioh ka kot, ban kiew ka jingioh kamai, ban bun ki kam, ban kyntiew ia ka rukom im bad ka jingkiew shaphrang jong ka Sustainable Development Goals (SDGS).

Ia ka jingpyntreikam yn leh da ka Meghalaya Infrastructure Development & Finance Corporation (MIDFC) ha ka jingïatreilang bad ka tnad Economic Affairs jongka Sorkar India. Kane ka projek ka dang don mynta hapoh ka jingpynkhreh bad la buh por ban pyni hakhmat jongki Executive Director jongka World Bank Board ban ïoh ïa ka jingmynjur kaba pura ha ka 19 tarik u Rymphang 2026. Kane ka jingmynjur kan plie ia ka lynti ban ioh ia ka pisa ban sdang noh ia ka kam ban pyntrei ïa ka projek.

Ka MLCIP kan pynleit jingmut ruh ha ki bynta kiba kongsan kum ka jingpynbeit ryntih ia ki jaka lum, ka jingpyndonkam biang ia ki maw ki shyiap kiba la tih, ban pyndonkam ia ki tiar ki tar kiba la pynmih na ka thain bad ban ithuh ia ki lad ban kyntiew ia ka bor ha kaban tei ia ka leit ka wan kaba paka.