Tuid ki nongialam na kylleng ki ri bad da ki lak ngut ki paidbah sha St Peters Square
Shillong Iaiong 26: Da ki lak ngut ki paid riewngeit ka Balang Catholic hynne ka sngi Saitjain, ha ryngkat bad ka jingiam pait dohnud kila iashimbynta ha ka jingtep don burom ia u Kpa Bakhuid u Pope Francis ha St Mary Major Basilica, ia kaba la wan ruh ban sakhi da ki nongialam bad ki khliehduh jong ki ri bapher bapher.
Ha ka por mynstep, la sdang ia ka lehniam lehrukom ban tep don burom ia u Pope Francis ha St Peter’s Square ha Vatican bad palat 2, 50000 tam ki paidbah kila ia poi dang step phyrngab ha kane ka jaka ban ioh iashimbynta ha ka jingleh burom khatduh ia u Pope bad wat ki nongialam na ki ri ki bapher bapher ruh kila wan ban iashimbynta lang halor ka jingkhlad jong u Pope uba la ioh ia ka jingieid ha ka pyrthei baroh kawei.
Ki nongialam bad ki khliehduh jong ki ri bapher bapher kiba kynthup ia u President ka ri America u Donald Trump, ka President jong ka ri India ka Droupadi Murmu, u President ka France u Emmanuel Macron, u President ka Ukraine u Volodymir Zelensky, u Myntri Rangbah duh ka Hungary u Viktor Orban, u President ka Argentina u Javier Milei bad bun bah ki khlieh bad ki nongialam na kylleng ki ri kila leit ban leh burom khatduh ia u Pope.
Kane ka jinglehniam kala sdang ha ka por 10 baje mynstep ha ka por Vatican ne 1:30 mynsngi ha ka por India.
Watla ka jingleh niam ha kaban tep don burom ia u Pope kala iaid shakhmat, hynrei ha kane ka sngi, ki riewngeit Catholic ha kylleng ki ri kila leit iashimbynta ha ka buh jingduwai kyrpang ha ka Requim Mass na ka bynta ka jingjahthait jong u Pope Francis bad ha ka jylla Meghalaya ruh la pynlong ia ka Requiem Mass ha ka Cathedral Church, Laitumkhrah bad ha kylleng ki Parish kiba don ha ka jylla.
Kumban shu pynkynmaw, u Pope Francis ula khlad noh ha ka 21 tarik u Iaiong, ha ka jaka sah ka jongu kaba don ha Domus Sanctae Marthae, Vatican City kaba dei ruh ka ‘Easter Monday’ bad ula pynbna ba ka jingkhlad noh ka jongu kadei namar ka jingpang Stroke, Coma bad ka jingbym lah treikam shuh jong u klongsnam.
La kha ia u Pope Francis ha ka 17 tarik u Nohprah 1936 ha Buenos Aires, Argentina bad ka kyrteng pura ka jongu ka kadei ‘Jorge Mario Bergoglio’.
U Jorge Mario Bergoglio ula wanrah ia ka jingkylla kaba khraw haba ula shimti kum u Pope jong ka Roman Catholic Church ha u bnai Lber jong u snem 2013 bad ula thaw ia ka histori ban long kum u Pope uba nyngkong eh jong ka Western Hemisphere, u South American uba nyngkong eh bad u Jesuit uba nyngkong eh ban ialam ia ka Balang Catholic ha ka pyrthei baroh kawei.
Ka rukom treikam jong u Pope ka long kaba shisur shidur bad ka jingai ia ka jingbishar kaba hok bad ula pynleit jingmut ha ki kam ban leh sngewsynei, ka jingkynthuplang bad ka jingpynthymmai bad ula thung ia ka Council jong ki 8 ngut ki Cardinal na ka bynta ban pyniar ia ka jingiamir jingmut ha ka Balang, kala wanrah ia ka jingkylla ba kan long kaba khuid ba suba bad ka jinglong nongialam kaba don ia ka jingiatreilang.
