Shah shoh u Professor ka NEHU ha ki runar ba wan rung jubor ha Ophis

Dei ki dkhot ka NEHUSU bad ki samla pule ba wan thombor :Dr Alok

Shillong, Iaiong 25 : Uwei u Professor ka North Eastern Hill University (NEHU) ula shah shoh tohmet ha ka kynhun ki runar, kiba la wan rung jubor hapoh ka Ophis treikam jong u ha ka janmiet sngi Palei.

Une u Professor u kyrteng u Dr Alok Singh jong ka Tnad Hindi ha kane ka skulbah.

Ban pynrem jur ia kane ka jingjia, ki nonghikai jong ka skulbah kila rai ban pynlong ia ka jingiakhih ba jai jai hakhmat ka Ophis treikam u Vice Chancellor mynta ka janmiet por 3 baje, ban pan ia ka jingkular na ki bor pyniaid bad dawa ruh ban shim ia ki sienjam ki ban pynthikna ia ka jingshngain bad jingiada ia ki nonghikai.

Ha ka sngi Palei, u Dr Alok Singh ula shah shoh dusmon ha ki runar kiba kam ialade ba ki dei ki nongkhmih jong ki bor pyniaid ka NEHU. Une u nonghikai ula mynsaw bad la hap ban kit ia u sha Hospital.

Haba batai ia kaei kaba jia, u Dr Alok Singh ula iathuh ba kane ka jingjia kala jia ha ka por 4:45 baje janmiet katba u dang don ha Ophis hapoh ka Tnad Hindi. U iathuh ba hynriew ngut ki samla pule kila wan rung ha Ophis bad kila khang ia ka jingkhang bad shu ktah kti beit beit ia u katba kiwei ki dang pahara ia ka jingkhang.

U Dr Alok u iathuh ba arngut na kine ki samla kila bat ia ka kti jong u katba saw ngut kila shoh ia u bad hadien katto katne por, kila khot ia ki samla ba pahara ia ka jingkhang ba kin iashoh lang. U iathuh ba kine ki samla ki khlem ailad satia iano iano ruh napoh ka Tnad ba kin wan shajar ka kamra ba u shong katba u dang mad ia ka jingshah thombor.

U Dr Alok u pyntip ba kine ki nongthombor ki khlem aidaw satia halor kane ka jingthombor hynrei kila shu kynnoh ia u ba u leh politics bad pyrshang ban pyniadei ia u bad ka Rashtriya Swayamsevak Sangh (RSS) bad Akhil Bharatiya Vidyarthi Parishad (ABVP).

“Nga iai kylli ia kaei ka daw, iathuh ia nga. Hynrei ki iai bteng ban shoh ia nga. Ki ong- me leh politics hangne-wanrah ia ki jingthmu bapher bapher hangne. Kila kynjat ia nga, kura ia nga wat haba ba nga la kyllon, kila khyllie ia nga bad kila bteng ban shoh” ula ong haba pynkynmaw ia kaei kaba jia.

Ula iathuh ruh ba hashuwa ban sdang kane ka jingthombor ba shiteng kynta eiei, kine ki samla kila knieh shuwa ia ka phone jong u, peit ia kiei kiba don hapoh ka phone kynthup ki dur bad video bad jynrat ia baroh ki waiar jong ka computer bad knieh ruh ia ka smart watch, da kaba suba ba ka dei ka camera ba buhrieh.

Ula iathuh ba kala don ruh ka por ba uwei na ki nongthombor ula shim ia ka khanshi na ka miej jong u bad pynap na ka ryndang bad byrngem ban pyniap ia nga. “Kila pynap da ka khanshi na ka ryngdang jong nga bad ong _Ngan pyniap ia me” ula ong.

“Ngam ju mutdur ba kum kane ka jingjia kan wan jia ia nga. Kum u nonghikai nga sngew bala shah pynjah burom. Ba u nonghikai un shah shoh kumne. Ki iai pyrshang ban pyniadei ia nga bad ka RSS bad ABVP bad iai shoh ia nga. Ngam ju mutdur ba ngan shah shoh hala ki jong ki samla pule” ula bynrap.

Ula iathuh ruh ba kine ki samla kila byrngem ia u ba u dei ban mih noh na ka skulbah bad ba nym wan phai shuh.

Haba kylli, u Dr Alok ula iathuh ba u lah ban pynithuh ia ki samla kiba donkti ban shoh ia u ia kaba u ong ba ki dei ki dkhot ka NEHUSU bad katto katne na ki samla pule jong u hi.

Namar ka jingshah shoh kaba jur, la pynkit noh ia u sha Civil Hospital ban ai jingsumar. Une u Nonghikai u bym pat ujor ejahar satia, ula kyrpad ia ki bor pyniaid ka NEHU bad kibor ba dei khmih ba kin leh eiei pyrshah ia kine ki samla bad ban ai ia u ia ka jingbishar kaba hok.

“Ngi, ki nonghikai ka NEHU, ngi ieng ryngkat bad u Dr Alok Singh bad ngi kwah pynpaw ia ka jingiatylli jong ngi bad u bad ha kano kano ka rukom ngin nym riej ia kum kine ki runar kiba kwah ban pynjah burom ia ka skulbah da kaba pynkhein ia ki rule, ki kyndon bad ki ain” ong ki nonghikai.

“Ngi la tip ia kaei kaba bad ngi la sakhi ia ki kam bad ki rukom treikam jong kine ki runar ha kine ki khyndiat bnai bala leit. Ki kam ialde ba ki dei ki nongkitkam ka NEHUSU. Ngi pynrem jur ia kane ka kam khawpud ba shu thombor” kila bynrap.

Kila ong “Kane ka kam kaba shyrkhei, kaba dei ka jingpyrshang ban pyniap ia u nonghikai ha la ka jong ka ophis, dei ban hap pynrem da ki kyntien kiba tyngeh tam. Kam dei tang ka jingshah thombor ia uwei u briew shimet, hynrei ia ka burom, ka jingshngain, bad ka jinglong kyntang jong ki nonghikai baroh kawei,”.

Ki nonghikai ka NEHU ki la dawa ruh na ki bor pyniaid jong ka skulbah, ka sorkar pdeng, bad ki bor pynjari ain, ba kin leh ia kaba dei khlem da pynslem bad ki nongleh bymman ki dei ban shah set ha along na ka bynta ka hok.