Iap u Corporal ka IAF na Arunachal ha ka jinghiar thma ki lehnoh ha Pahalgam, sngewlem u CM Khandu

Shillong, Iaiong 23: U wei u shipai jong ka Indian Air Force (IAF) uba bat ia ka kyrdan kum u Corporal ha Arunachal Pradesh u Tage Hailyang, u dei u wei napdeng ki lanot uba la iap ha ka jingthom bor jong ki lehnoh ha Pahalgam, kaba hap ha Jammu bad Kashmir ha ka sngi ba-ar ha kaba haduh 28 ngut ki briew kila iap kynthup ia katto katne ngut ki nongwan jngoh kai pyrthei.

U Corporal Hailyang, 30 snem ka rta u dei na ka shnong Tajang kaba hap hapoh Ziro, jong ka Lower Subansiri district hynrei u la leit shakri ha ka ktem ka IAF ha Srinagar. U la leit kai bad la ka kurim ha Pahalgam ha shwa ba ka jingshah thombor kan jia.

Ki lehnoh kiba la pynkhreh bha ha ryngkat bad ki tiar siat kila shu siat pathar ha kawei ka kynhun jong ki nongwan jngohkai pyrthei ha kawei na ki jaka ba itynnad bha ha Baisaran valley, ia kaba la ju tip kum ka “Mini Switzerland” jong ka Kashmir.

Na ka liang u Myntri Rangbah ka jylla Arunachal Pradesh u Pema Khandu u la pynpaw ka jingsngewsih kaba jur halor ka jingkhlad noh u samla rangbah uba dei u Corporal jong ka Air Force corporal.Ha ka kyrwoh kaba sngewsih ha ki rynsan social media, u la thoh, “U dap da ka jingsngewsih halor ka jingduh ia u Corporal u Tage Hailyang jong ka Indian Air Force, uba dei u khun ba shlur jong ka Arunachal Pradesh uba dei na shnong Tajang jong ka Lower Subansiri. Katba u dang leit kai sha Pahalgam ha ryngkat bad ka kurim u la shah pyniap ha ki lehnoh. U la shakri ia ka ri da ka jingshlur bad da ka mynsiem ba shynrang hynrei ka jingkhlad noh bym pat dei por kadei ka jingduh ba khraw ym tang ia ka iing ka sem jong u hynrei ia ka ri ruh kumjuh. Ka jingmut jingpyrkhat kan don lang bad ka ïing ka sem bad khamtam eh ia ka kurim kaba lait im na katei ka jingjia ba shyrkhei bad ngin iai kynmaw ia u Corporal Hailyang na ka bynta ka jingshakri bad ka jinglen lade. Om Mane Padme Hum.” u la ong.